വയനാട് ദുരന്തബാധിത പ്രദേശം സന്ദര്ശിക്കാന് സൈനിക യൂണിഫോമില് എത്തിയ മേജര് രവിക്കെതിരെ പരാതി. ഡിഫന്സ് സര്വ്വീസ് റെഗുലേഷന് പ്രകാരം സൈന്യത്തില് നിന്നും വിരമിച്ചയാള് സൈനിക യൂണിഫോം ഉപയോഗിക്കുന്നത് ചട്ടലംഘനമാണ്, മേജര് രവി സൈനിക യൂണിഫോം ദുരുപയോഗം ചെയ്തു എന്നാണ് പരാതി.
സൈന്യത്തില് നിന്നും വിരമിച്ച ആര്എ അരുണ് എന്നയാളാണ് പ്രധാനമന്ത്രി, പ്രതിരോധ മന്ത്രി, കേരള മുഖ്യമന്ത്രി, ഡിജിപി, വയനാട് എസ്പി എന്നിവര്ക്ക് പരാതി നല്കിയത്. സൈനിക യൂണിഫോം ദുരുപയോഗം ചെയ്യാന് പ്രേരിപ്പിക്കുന്നതാണ് മേജര് രവിയുടെ പ്രവര്ത്തി.
ഇത് സുരക്ഷാ പ്രശ്നങ്ങള് ഉയര്ത്തും. ദേശസുരക്ഷയ്ക്ക് ഭീഷണിയാണ്. മേജര് രവിക്കെതിരെ നടപടിയെടുത്ത് ഇന്ത്യന് മിലിട്ടറി യൂണിഫോമിന്റെ അന്തസ്സ് കാത്തുസൂക്ഷിക്കുന്നുവെന്ന് ഉറപ്പാക്കണം എന്നാണ് പരാതിയില് പറയുന്നത്.
അതേസമയം, ഇന്നലെയായിരുന്നു ലഫ്റ്റനന്റ് കേണല് മോഹന്ലാലിനൊപ്പം മേജര് രവി സൈനിക യൂണിഫോമില് വയനാട്ടിലെ ദുരന്തമുഖത്ത് എത്തിയത്. മോഹന്ലാലിന്റെ നേതൃത്വത്തിലുള്ള വിശ്വശാന്തി ഫൗണ്ടേഷന് മാനേജിങ് ഡയറക്ടര് ആണ് നിലവില് മേജര് രവി.
വിശ്വശാന്തി ഫൗണ്ടേഷന് 3 കോടി രൂപയുടെ സഹായമാണ് വയനാടിനായി കഴിഞ്ഞ ദിവസം പ്രഖ്യാപിച്ചത്. വിശ്വശാന്തി ഫൗണ്ടേഷന് വഴി മുണ്ടക്കൈ സ്കൂള് പുതുക്കി പണിയുന്നത് അടക്കമുള്ള കാര്യങ്ങളാണ് മേജര് രവി ഇന്നലെ പ്രഖ്യാപിച്ചത്. ദുരന്തമുഖത്ത് നിന്നുള്ള മേജര് രവിയുടെ സെല്ഫിയും ഇന്നലെ വിവാദമായിരുന്നു.