അപര്ണ ബാലമുരളിയോട് കോളജ് യൂണിയന് ഉത്ഘാടനവേദിയില് വച്ച് മോശമായി പെരുമാറി വിദ്യാര്ഥി. ഇയാള് അപര്ണയുടെ കയ്യില് ബലമായി പിടിച്ചു വലിക്കുന്നതും അപര്ണ അപ്പോള് അനിഷ്ടം പ്രകടിപ്പിക്കുന്നതും ഇയാള് അപ്പോള് നടിയുടെ തോളില് പിടിക്കാന് ശ്രമിക്കുന്നതും വിഡിയോയിലുണ്ട്.
തങ്കം സിനിമയുടെ പ്രമോഷനുവേണ്ടി ലോ കോളജില് എത്തിയതായിരുന്നു നടി. അപര്ണയോടൊപ്പം നടന് വിനീത് ശ്രീനിവാസനും സംഗീത സംവിധായകന് ബിജിപാലും ചിത്രത്തിന്റെ മറ്റു അണിയറപ്രവര്ത്തകരും ഉണ്ടായിരുന്നു.
അപര്ണയ്ക്ക് പൂവ് സമ്മാനിക്കാന് അടുത്തെത്തിയ വിദ്യാര്ഥി അപര്ണയുടെ കയ്യില് പിടിച്ചു വലിച്ച് എഴുന്നേല്പ്പിച്ചു. നടി അനിഷ്ടം പ്രകടമായത് വിഡിയോയില് വ്യക്തമായി ദൃശ്യമാണ്. വീണ്ടും യുവാവ് അപര്ണയുടെ തോളില് കയറി പിടിക്കുകയും അപര്ണ വെട്ടിച്ച് മാറുകയും ചെയ്യുന്നുണ്ട്.
പെരുമാറ്റം നടിക്ക് ഇഷ്ടപ്പെട്ടില്ലെന്നത് തിരിച്ചറിഞ്ഞ വിദ്യാര്ഥികളിലൊരാള് പിന്നീട് വേദിയില് വച്ചുതന്നെ അപര്ണയോട് ക്ഷമ പറഞ്ഞു. തുടര്ന്ന് യുവാവ് വീണ്ടും എത്തുകയും താന് ഒന്നുമുദ്ദേശിച്ച് ചെയ്തതല്ല അപര്ണയുടെ ഫാന് ആയതുകൊണ്ട് ഫോട്ടോ എടുക്കാന് ശ്രമിച്ചതാണെന്നും പറയുന്നുണ്ട്. വീണ്ടും കൈ നീട്ടിയ യുവാവിന് കൈ കൊടുക്കാന് അപര്ണ വിസമ്മതിച്ചതിനെ തുടര്ന്ന് യുവാവ് ഒപ്പമുണ്ടായിരുന്ന വിനീതിന് കൈ കൊടുക്കാന് ശ്രമിച്ചു. എന്നാല് കൈകൊടുക്കുന്നില്ല.
വിഡിയോ ഇതിനകം സോഷ്യല്മീഡിയയില് വൈറലായി കഴിഞ്ഞു. നിരവധിപ്പേരാണ് അപര്ണയെ പിന്തുണച്ചും അഭിനന്ദിച്ചും രംഗത്തുവരുന്നത്.