ലിജോ ജോസ് പെല്ലിശ്ശേരി ചിത്രമായ് ജല്ലിക്കെട്ടിന് പ്രഖ്യാപന വേള മുതല് മികച്ച സ്വീകാര്യതയാണ് ലഭിച്ചുകൊണ്ടിരിക്കുന്നത്. ചിത്രത്തിന്റെ ടൈറ്റില് പുറത്തിറങ്ങിയതു മുതല് പ്രേക്ഷക പ്രതീക്ഷകള് വര്ദ്ധിച്ചിരുന്നു. ഇത്തവണയും വ്യത്യസ്തമാര്ന്ന പ്രമേയം പറയുന്ന ചിത്രവുമായിട്ടാണ് ലിജോ എത്തുന്നതെന്നാണ് അറിയുന്നത്. വമ്പന് റിലീസിന് ഒരുങ്ങുന്ന ജല്ലിക്കെട്ടിന്റെ പുതിയ ചിത്രങ്ങള് വലിയ ശ്രദ്ധ നേടിയിരുന്നു. ഇപ്പോഴിതാ അതിന് പിന്നാലെ ചെമ്പന് വിനോദ് ഗുഹാമനുഷ്യനായി നില്ക്കുന്ന ലൊക്കേഷന് സ്റ്റില് പുറത്തുവന്നിരിക്കുകയാണ്. ചിത്രം പുറത്തുവന്ന് അധികം വൈകാതെ തന്നെ സോഷ്യല് മീഡിയയില് ചെമ്പന് വിനോദിന്റെ ലുക്ക് വൈറലായി.
എസ് ഹരീഷിന്റെ മാവോയിസ്റ്റ് എന്ന കഥയെ ആസ്പദമാക്കിയാണ് ജല്ലിക്കെട്ട് ഒരുങ്ങുന്നത്. അറവുശാലയില്നിന്ന് കയര്പൊട്ടിച്ചോടിയ ഒരു പോത്തിന്റേയും എരുമയുടേയും പരാക്രമങ്ങള് പശ്ചാത്തലമാക്കി മനുഷ്യാവസ്ഥയുടെ വര്ത്തമാന ജീര്ണ്ണതയെ വിചാരണ ചെയ്യുന്ന ലക്ഷണമൊത്ത കഥയാണ് “മാവോയിസ്റ്റ്.” എസ് ഹരീഷും ആര് ജയകുമാറും ചേര്ന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. ഓ തോമസ് പണിക്കരാണ് ചിത്രം നിര്മ്മിച്ചിരിക്കുന്നത്. ഗിരീഷ് ഗംഗാദരന് ആണ് ഛായാഗ്രഹണം. സംഗീതം പ്രശാന്ത് പിള്ളയാണ്.
ജല്ലിക്കെട്ട് എന്ന പേര് പ്രഖ്യാപിച്ചതു മുതല് തമിഴ്നാട്ടിലെ കാളപ്പോരായ ജെല്ലിക്കെട്ടിനെ ആസ്പദമാക്കിയാണോ ചിത്രമെന്ന് എല്ലാവരിലും സംശയമുണ്ടായിരുന്നു. എന്നാല് സിനിമയുടെ പ്രമേയം ഇപ്പോള് തനിക്ക് വെളിപ്പെടുത്താനാവില്ലെന്ന് ലിജോ ജോസ് പെല്ലിശ്ശേരി തന്നെ ഒരഭിമുഖത്തില് പറഞ്ഞിരുന്നു. ഒരു പോത്തും കുറെ മനുഷ്യരുമാണ് ചിത്രത്തില് അഭിനയിക്കുകയെന്നായിരുന്നു ലിജോ ഫേസ്ബുക്ക് വഴി അറിയിച്ചിരുന്നത്. എസ് ഹരീഷും ആര് ജയകുമാറും ഒരുക്കിയ തിരക്കഥയിലാണ് ലിജോ ഈ ചിത്രം അണിയിച്ചൊരുക്കുന്നത്.