ടിനു പാപ്പച്ചന്‍ സംവിധാനം ചെയ്യുന്ന ‘ചാവേര്‍’ ചിത്രം നാളെ തിയേറ്ററുകളിലേക്ക് എത്തുകയാണ്. എന്നാല്‍ ഇതുവരെ ചിത്രത്തിന്റെ ട്രെയ്‌ലര്‍ പോലും പുറത്തുവന്നിട്ടില്ല. ഏഴ് മാസത്തിന് മുമ്പാണ് ചിത്രത്തിന്റെ മോഷന്‍ പോസ്റ്റര്‍ എത്തിയത്. കുഞ്ചാക്കോ ബോബന്റെ ആക്ഷന്‍ രംഗം അടക്കം അടങ്ങുന്നതായിരുന്നു മോഷന്‍ പോസ്റ്റര്‍.
ഇതിന് ശേഷം ചിത്രത്തിന്റെ സ്റ്റില്ലുകള്‍ മാത്രമാണ് പുറത്തുവന്നത്. ടീസറോ, ട്രെയ്‌ലറോ, ഗാനങ്ങളോ പുറത്തു വിട്ടിട്ടില്ല. അതുകൊണ്ട് തന്നെ പ്രേക്ഷകര്‍ ആകാംഷയിലാണ്. നാളെ റിലീസിന് ഒരുങ്ങുന്ന ചിത്രത്തിന്റെ മറ്റ് വിവരങ്ങള്‍ ഒന്നും എത്താതായതോടെയാണ് പലരും ടിനു പാപ്പച്ചന്‍ പങ്കുവച്ച ചിത്രങ്ങള്‍ക്ക് താഴെ അപ്‌ഡേറ്റ് ചോദിച്ച് എത്തുന്നത്.
നാളെ ചിത്രം റിലീസ് ചെയ്യാനിരിക്കുകയാണെങ്കിലും കൂടുതല്‍ പോസ്റ്ററുകളോ വിവരങ്ങളോ ഒന്നും തന്നെ അണിയറ പ്രവര്‍ത്തകര്‍ പങ്കുവച്ചിട്ടില്ല. ‘സ്വാതന്ത്ര്യം അര്‍ദ്ധരാത്രിയില്‍’, ‘അജഗജാന്തരം’ എന്നീ സൂപ്പര്‍ ഹിറ്റ് സിനിമകള്‍ക്ക് ശേഷം ടിനു പാപ്പച്ചന്‍ ഒരുക്കുന്ന ചിത്രമാണ് ചാവേര്‍.
നടനും സംവിധായകനുമായ ജോയ് മാത്യു തിരക്കഥയൊരുക്കുന്ന ചിത്രം അരുണ്‍ നാരായണ്‍, വേണു കുന്നപ്പിള്ളി എന്നിവര്‍ ചേര്‍ന്നാണ് നിര്‍മിക്കുന്നത്. ഛായാഗ്രഹണം: ജിന്റോ ജോര്‍ജ്ജ്, എഡിറ്റര്‍: നിഷാദ് യൂസഫ്, സംഗീതം: ജസ്റ്റിന്‍ വര്‍ഗീസ്, പ്രൊഡക്ഷന്‍ ഡിസൈന്‍: ഗോകുല്‍ ദാസ്.
