റെഡ് കാര്പ്പെറ്റില് നഗ്നതാ പ്രദര്ശനം വിലക്കി കാന് ഫെസ്റ്റിവല്. ഫാഷനെ നിയന്ത്രിക്കുക എന്ന ലക്ഷ്യത്തോടെയല്ല, പൂര്ണ്ണമായ നഗ്നതാ പ്രദര്ശനങ്ങള് ഒഴിവാക്കുക മാത്രമാണ് ഉദ്ദേശിക്കുന്നത് എന്നാണ് ഫെസ്റ്റിവല് പുറത്തിറക്കിയ വാര്ത്താകുറിപ്പില് പറയുന്നത്.
2022ല് നടന്ന മാറുമറയ്ക്കാതെയുള്ള പ്രതിഷേധം, ഗ്രാമി അവാര്ഡ്ദാന ചടങ്ങിലെ സുതാര്യമായ വസ്ത്രധാരണം എന്നിവ ഉള്പ്പെടെയുള്ള സംഭവങ്ങളുടെ പശ്ചാത്തലത്തിലാണ് ഈ തീരുമാനമെന്നാണ് റിപ്പോര്ട്ടുകള്. നഗ്നത പ്രദര്ശിപ്പിക്കുന്ന വസ്ത്രങ്ങള് ധരിച്ചെത്തുന്നവര് മറ്റുള്ളവര്ക്ക് ബുദ്ധിമുട്ടുണ്ടാക്കുകയും സുരക്ഷാ പ്രശ്നങ്ങള് സൃഷ്ടിക്കുകയും ചെയ്യുമെന്നും സംഘാടകര് ചൂണ്ടിക്കാട്ടി.
പരിഷ്കരിച്ച ചാര്ട്ടര് പ്രകാരം ഫെസ്റ്റിവല് വേദിയിലൂടെയുള്ള സഞ്ചാരം തടസപ്പെടുത്തുന്നതോ ഇരിപ്പിടങ്ങളുടെ ക്രമീകരണത്തിന് ബുദ്ധിമുട്ടുണ്ടാക്കുന്നതോ ആയ തരത്തിലുള്ള വസ്ത്രങ്ങള് ധരിക്കുന്നവര്ക്ക് പ്രവേശനം നിഷേധിക്കാന് ഫെസ്റ്റിവലിന് അധികാരമുണ്ടാകും.
അതേസമയം, ഗ്രാമി വേദിയില് ഓസ്ട്രേലിയന് മോഡല് ബിയാങ്ക സെന്സൊറി വളരെ സുതാര്യമായ വേഷം ധരിച്ച് പൂര്ണ്ണമായും നഗ്നത പ്രദര്ശിപ്പിച്ച സംഭവം ഏറെ വിവാദമായിരുന്നു. ഭര്ത്താവായ ഗായകന് കാന്യേ വെസ്റ്റിന്റെ നിര്ദേശപ്രകാരമാണ് താന് ഇത് ചെയ്തത് എന്നായിരുന്നു ബിയാങ്കയുടെ വിശദീകരണം.