മെഗാസ്റ്റാര്‍ മമ്മൂട്ടിയെ നായകനാക്കി അമല്‍ നീരദ് പ്രഖ്യാപിച്ചിരിക്കുന്ന ചിത്രമാണ് ബിലാല്‍. അമലിന്റെ അരങ്ങേറ്റ ചിത്രമായിരുന്ന ബിഗ് ബിയുടെ രണ്ടാം ഭാഗമായാണ് ബിലാല്‍ ഒരുങ്ങുന്നത്. 2007 ഇല്‍ റിലീസ് ചെയ്ത ബിഗ് ബിയില്‍ മമ്മൂട്ടിക്കൊപ്പം മനോജ് കെ ജയന്‍, ബാല, മംമ്ത മോഹന്‍ദാസ്, ഇന്നസെന്റ്, ജാഫര്‍ ഇടുക്കി തുടങ്ങി ഒട്ടേറെ പ്രമുഖ താരങ്ങള്‍ അഭിനയിച്ചിരുന്നു.
ബിഗ് ബിയില്‍ എടുത്തു പറയുന്ന മറ്റൊരു കഥാപാത്രമാണ് അബു ജോണ്‍ കുരിശിങ്കല്‍. ഈ കഥാപാത്രത്തിന്റെ കൂടി കഥയാണ് ബിലാലില്‍ ഉണ്ടാവുക എന്നും അബുവായി എത്തുന്നത് ഫഹദ് ഫാസില്‍ ആണെന്നും വാര്‍ത്തകള്‍ വന്നിരുന്നു. ഇപ്പോഴിതാ, തങ്കം സിനിമയുടെ പ്രമോഷന്റെ ഭാഗമായി നടത്തിയ പ്രസ് മീറ്റില്‍, തങ്കത്തിന്റെ നിര്‍മ്മാതാക്കളിലൊരാളായി പങ്കെടുത്ത ഫഹദ് ഫാസിലിനോട് തന്നെ ഈ ചോദ്യം നേരിട്ട് ചോദിച്ചിരിക്കുകയാണ് മാധ്യമ പ്രവര്‍ത്തകര്‍.
ബിലാലില്‍ അബു ജോണ്‍ കുരിശിങ്കല്‍ ആയി ഫഹദ് ഫാസിലാണോ എന്ന ചോദ്യത്തിന് ഫഹദ് നല്‍കുന്ന മറുപടി, അബു ജോണ്‍ കുരിശിങ്കല്‍ എന്ന കഥാപാത്രമാകാന്‍ തന്നെ ആരും സമീപിച്ചിട്ടില്ല എന്നാണ്. നിര്‍മ്മാതാക്കളുടെ ലിസ്റ്റില്‍ ഫഹദിന്റെ പേരും കണ്ടിരുന്നല്ലോ എന്ന ചോദ്യത്തിന് ഇപ്പോള്‍ ആ ലിസ്റ്റില്‍ താന്‍ ഇല്ല എന്നും ഫഹദ് മറുപടി നല്‍കി.
അമല്‍ നീരദ് 2017 ഇല്‍ പ്രഖ്യാപിച്ച ചിത്രമാണ് ബിലാല്‍. ഇത്രയും വര്‍ഷം പ്രൊജക്റ്റ് നീണ്ടു പോയത് കൊണ്ട് തന്നെ ബിലാല്‍ എന്നുവരുമെന്നറിയാന്‍ ഏറെ ആകാംക്ഷയോടെയാണ് പ്രേക്ഷകര്‍ കാത്തിരിക്കുന്നത്.