തണ്ണീർ മത്തൻ ദിനങ്ങൾ, സൂപ്പർ ശരണ്യ എന്നീ ചിത്രങ്ങൾക്ക് ശേഷം ഗിരീഷ് എ. ഡി സംവിധാനം ചെയ്യുന്ന ഏറ്റവും പുതിയ ചിത്രം ‘പ്രേമലു’വിന്റെ ഫസ്റ്റ്ലുക്ക് പോസ്റ്റർ പുറത്ത്. ഭാവന സ്റ്റുഡിയോസിന്റെ ബാനറിൽ പുറത്തിറങ്ങുന്ന ചിത്രത്തിൽ നസ്ലിനും മമിത ബൈജുവുമാണ് പ്രധാന താരങ്ങൾ. റൊമാന്റിക്- കോമഡി ഴോണറിലാണ് ചിത്രമൊരുങ്ങുന്നത്.
ശ്യാം മോഹൻ, അഖില ഭാർഗവൻ, സംഗീത് പ്രതാപ്, അൽതാഫ് സലിം, മീനാക്ഷി രവീന്ദ്രൻ എന്നിവരാണ് ചിത്രത്തിലെ മറ്റ് താരങ്ങൾ. ഹൈദരാബാദ് പശ്ചാത്തലമായാണ് ചിത്രമൊരുങ്ങുന്നത്.
ഭാവന സ്റ്റുഡിയോസിന്റെ ബാനറിൽ ദിലീഷ് പോത്തൻ, ഫഹദ് ഫാസിൽ, ശ്യാം പുഷ്ക്കരൻ എന്നിവർ ചേർന്നാണ് പ്രേമലു നിർമ്മിക്കുന്നത്. കുമ്പളങ്ങി നൈറ്റ്സ്, ജോജി, പാൽതു ജാൻവർ, തങ്കം എന്നീ സിനിമകൾക്ക് ശേഷം ഭാവന സ്റ്റുഡിയോസിന്റെ ബാനറിൽ പുറത്തിറങ്ങുന്ന ഏറ്റവും പുതിയ ചിത്രമായതുകൊണ്ട് തന്നെ പ്രേമലുവിനു വേണ്ടിയും പ്രതീക്ഷയോടെയാണ് പ്രേക്ഷകർ കാത്തിരിക്കുന്നത്. വിഷ്ണു വിജയ് സംഗീതമൊരുക്കുന്ന ചിത്രത്തിൽ അജ്മൽ സാബു ആണ് ഛായാഗ്രഹണം നിർവഹിക്കുന്നത്.
നേരത്തെ നസ്ലൻ നായകനായി ഗിരീഷ് എ. ഡി സംവിധാനം ചെയ്യുന്ന ‘കാതലൻ’ സിനിമയുടെ ഫസ്റ്റ്ലുക്ക് പോസ്റ്ററും പുറത്തുവന്നിരുന്നു. അനിഷ്മ എന്ന പുതുമുഖതാരമാണ് ചിത്രത്തിൽ നായിക. ദിലീഷ് പോത്തൻ, ലിജോമോൾ, വിനീത് വാസുദേവൻ, ടി. ജി രവി, വിനീത് വിശ്വം, സജിൻ എന്നിവരാണ് കാതലൻ സിനിമയിലെ മറ്റ് താരങ്ങൾ.
ഗിരീഷ് എ. ഡിയുടെ മുൻ ചിത്രങ്ങളായ തണ്ണീർമത്തൻ ദിനങ്ങളിലും, സൂപ്പർ ശരണ്യയിലും ശ്രദ്ധേയമായ പ്രകടനമായിരുന്നു നസ്ലെൻ കാഴ്ചവെച്ചത്. അടുത്ത സിനിമയിലും ഈ കൂട്ടുകെട്ട് ആവർത്തിക്കുമ്പോൾ വളരെ പ്രതീക്ഷയിലാണ് പ്രേക്ഷകർ പുതിയ രണ്ട് ചിത്രങ്ങളെ നോക്കികാണുന്നത്.