വെട്രിമാരന്- ധനുഷ് കൂട്ടുകെട്ടില് ഒരുങ്ങുന്ന പുതിയ ചിത്രമാണ് അസുരന്. ധനുഷ് നായകനാകുന്ന ചിത്രത്തില് നായികയായെത്തുന്നത് മലയാളത്തിന്റെ പ്രിയനടി മഞ്ജു വാര്യരാണ്. മഞ്ജുവിന്റെ തമിഴ് സിനിമയിലേക്കുള്ള അരങ്ങേറ്റ ചിത്രം കൂടിയായ അസുരന്റെ ഓഡിയോ ലോഞ്ച് കഴിഞ്ഞ ദിവസം നടന്നിരുന്നു. താന് അങ്ങോട്ട് നിര്ബന്ധിച്ചാണ് മഞ്ജുവിന് പ്രതിഫലത്തുക നല്കിയതെന്ന് ചടങ്ങില് ചിത്രത്തിന്റെ നിര്മ്മാതാവ് കലൈപ്പുളി എസ്. തനു പറഞ്ഞു.
“അസുരന്റെ അഡ്വാന്സ് തുക മാത്രം കൈപ്പറ്റിക്കൊണ്ടാണ് മഞ്ജു ചിത്രത്തില് അഭിനയിച്ചത്. പിന്നീടൊന്നും ബാക്കി തുകയെ കുറിച്ച് അവര് സംസാരിച്ചിരുന്നില്ല. ഞാന് അങ്ങോട്ട് നിര്ബന്ധിച്ച് പ്രതിഫലത്തുക കൈമാറുകയായിരുന്നു.” കലൈപ്പുളി എസ്. തനു പറഞ്ഞു. തമിഴില് ഇത്ര ശക്തമായ ടീമിനൊപ്പം പ്രവര്ത്തിക്കാന് കഴിഞ്ഞത് വലിയൊരു ഭാഗ്യമായി കരുതുന്നു എന്നാണ് മഞ്ജു ചടങ്ങില് പറഞ്ഞത്.
“പൊല്ലാതവന്”, “ആടുകളം”, “വടചെന്നൈ” എന്നീ വിജയ ചിത്രങ്ങള്ക്ക് ശേഷം ധനുഷ്-വെട്രിമാരന് കൂട്ടുകെട്ടിന്റെ നാലാമത് ചിത്രമാണ് അസുരന്. ചിത്രത്തില് ധനുഷിന്റെ ഭാര്യയായാണ് മഞ്ജു എത്തുന്നത്. മണിമേഖലൈ എന്നാണ് മഞ്ജുവിന്റെ കഥാപാത്രത്തിന്റെ പേര്. “വെക്കൈ” എന്ന തമിഴ് നോവലിന്റെ സിനിമാ ആവിഷ്കാരമാണ് “അസുരന്”. ഒക്ടോബര് നാലിന് ചിത്രം തിയേറ്ററുകളിലെത്തും.