സണ്ണി വെയ്നും ഗൗരി കിഷനും ആദ്യമായി ഒന്നിക്കുന്ന “അനുഗ്രഹീതന് ആന്റണി”യിലെ “”നീയെ”” ഗാനത്തിന്റെ ലിറിക്കല് വീഡിയോ പുറത്ത്. വിനീത് ശ്രീവനിവാസനും ഹരിത ബാലകൃഷ്ണനും ചേര്ന്ന് ആലപിച്ച ഗാനം നിവിന് പോളിയാണ് ഫെയ്സ്ബുക്ക് പേജിലൂടെ റിലീസ് ചെയ്തത്. മനു മഞ്ജിത്ത് എഴുതിയ വരികള്ക്ക് അരുണ് മുരളീധരന് ആണ് സംഗീതമൊരുക്കിയത്.
ലക്ഷ്യ എന്റര്ടെയ്ന്മെന്റിന്റെ ബാനറില് എം ഷിജിത്ത് നിര്മ്മിച്ചു നവാഗതനായ പ്രിന്സ് ജോയ് ആണ് ചിത്രം സംവിധാനം ചെയ്യുന്നത്. സിദ്ധിഖ്, ഇന്ദ്രന്സ്, സൂരജ് വെഞ്ഞാറമൂട്, ബൈജു സന്തോഷ്, ഷൈന് ടോം ചാക്കോ, മാല പാര്വതി, മുത്തുമണി, മണികണ്ഠന് ആചാരി, ജാഫര് ഇടുക്കി തുടങ്ങിയവരും ചിത്രത്തില് വേഷമിടുന്നു.
ജിഷ്ണു എസ് രമേശിന്റേയും അശ്വിന് പ്രകാശിന്റെയും കഥയ്ക്ക് തിരക്കഥ ഒരുക്കിയിക്കുന്നത് നവീന് ടി. മണിലാല് ആണ്. ചിത്രത്തിലെ ഹരിശങ്കര് കെ എസ് ആലപിച്ച “കാമിനി” എന്ന ഗാനം സോഷ്യല് മീഡിയയില് വൈറലായിരുന്നു. പിന്നാലെ ടോപ് സിങ്ങര് ഫെയിം അനന്യ ദിനേശിന്റെ ശബ്ദത്തില് വന്ന “ബൗ ബൗ” എന്ന ഗാനവും പ്രേക്ഷകര് സ്വീകരിച്ചിരുന്നു.
സെല്വകുമാര് ഛായാഗ്രഹണവും അപ്പു ഭട്ടതിരി എഡിറ്റിംഗും നിര്വ്വഹിക്കുന്നു. അരുണ് വെഞ്ഞാറമൂട് ആര്ട്ട് ഡയറക്ടര്. ശങ്കരന് എ.എസും, സിദ്ധാര്ത്ഥന് കെ.സിയും സൗണ്ട് ഡിസൈന് ചെയ്തിരിക്കുന്ന അനുഗ്രഹീതന് ആന്റണിയുടെ എക്സിക്യൂട്ടീവ് പ്രൊഡ്യൂസര് ബിജു ബെര്ണാഡ് ആണ്. ചിത്രത്തിന്റെ റിലീസ് തീയതി പുറത്തുവിട്ടിട്ടില്ല.