ആർഡിഎക്സിൻ്റെ തകർപ്പൻ വിജയത്തിനു ശേഷം വീക്കെൻ്റ് ബ്ലോക്ക്ബസ്റ്റർസിൻ്റെ ബാനറിൽ സോഫിയാ പോൾ നിർമിക്കുന്ന പുതിയ ചിത്രത്തിൽ ആന്റണി വർഗീസ് നായകനാകുന്നു. നവാഗതനായ അജിത് മാമ്പള്ളി ആണ് ചിത്രം സംവിധാനം ചെയ്യുന്നത്.
കടൽ പശ്ചാത്തലത്തിൽ ഒരു റിവഞ്ച് ആക്ഷൻ ഡ്രാമയായാണ് ചിത്രം എത്തുന്നതെന്ന് റിപ്പോർട്ടുകൾ. വലിയ മുടക്കുമുതലിൽ അവതരിപ്പിക്കുന്ന ചിത്രത്തിൽ വൻ താരനിരയും ഉണ്ടാകുമെന്നാണ് പുറത്തു വരുന്ന റിപ്പോർട്ട്.
റോയലിൻ റോബർട്ട്, സതീഷ് തോന്നക്കൽ, അജിത് മാമ്പള്ളി എന്നിവരുടേതാണ് തിരക്കഥ. തമിഴ് സംവിധായകൻ എസ്. ആർ. പ്രഭാകരൻ, സലീൽ – രഞ്ജിത്ത്, ഫാന്റം പ്രവീൺ, പ്രശോഭ് വിജയൻ തുടങ്ങിയവർക്കൊപ്പം സഹസംവിധായകനായി അജിത് മാമ്പള്ളി പ്രവർത്തിച്ചിട്ടുണ്ട്. അജിത് മാമ്പള്ളിയുടെ സ്വതന്ത്രസംവിധായകനായുള്ള അരങ്ങേറ്റമാണ് ചിത്രം.
ആര്ഡിഎക്സിന് സംഗീതം ഒരുക്കിയ സാം.സി.എസ് തന്നെയാണ് പുതിയ സിനിമക്കും സംഗീതവും പശ്ചാത്തല സംഗീതവും ഒരുക്കുന്നത്. സെപ്റ്റംബർ പതിനാറ് കൊച്ചി, ഇടപ്പള്ളി അഞ്ചു മന ദേവീക്ഷേത്രത്തിൽ നടക്കുന്ന പൂജാ ചടങ്ങോടെ ചിത്രത്തിന് തുടക്കം കുറിക്കും.