നടനും എഴുത്തുകാരനുമായ ശങ്കര് രാമകൃഷ്ണന് സംവിധാനം ചെയ്ത പതിനെട്ടാം പടി കഴിഞ്ഞ ദിവസം തിയേറ്ററുകളിലെത്തിയിരുന്നു. ചിത്രത്തിന് പ്രേക്ഷകരില് നിന്ന് മികച്ച പ്രതികരണമാണ് ലഭിക്കുന്നത്. ജോണ് ഏബ്രഹാം പാലയ്ക്കലായുള്ള മമ്മൂട്ടിയുടെ പ്രകടനവും മറ്റ് താരങ്ങളുടെയും പുതുമുഖങ്ങളുടെയും അഭിനയവും ഗംഭീരമായിട്ടുണ്ടെന്നാണ് സോഷ്യല് മീഡിയയിലൂടെ പ്രേക്ഷകര് പ്രതികരിക്കുന്നത്. ഇപ്പോഴിതാ ചിത്രത്തെ പ്രശംസിച്ച് രംഗത്തു വന്നിരിക്കുകയാണ് നടന് അനൂപ് മേനോന്. മലയാളത്തിലെ തന്നെ മികച്ച ചിത്രങ്ങളെടുത്താല് അതിലൊന്നായിരിക്കും പതിനെട്ടാം പടിയെന്ന് അനൂപ് മേനോന് ഫെയ്സ്ബുക്കില് കുറിച്ചു.
“പതിനെട്ടാംപടി കണ്ടു.. അതിരറ്റ സിനിമാനുഭവമാണ്… ഓരോ ചെറിയ അംശവും എനിക്കിഷ്ടപ്പെട്ടു.. ശങ്കര് രാമകൃഷ്ണന്.. പ്രിയപ്പെട്ട ശങ്കൂ.. ഇന്നത്തെ ദിവസം നിന്റേതാണ്.. മലയാളത്തിലെ തന്നെ മികച്ച ചിത്രങ്ങളെടുത്താല് അതിലൊന്നാകുമിത്.. ഈ ചിത്രമെടുക്കാന് നീ നേരിട്ട വേദനയും അനുഭവിച്ച ഹീനമായ താഴ്ത്തിക്കെട്ടലുകളും ശകാരങ്ങളും ഞാന് കണ്ടിട്ടുള്ളതാണ്.. പുതിയ സിനിമാമോഹികള്ക്കും നവാഗതരായ സംവിധായകര്ക്കും മുകളില് നീ പ്രചോദനമായി ഉയര്ന്നു നില്ക്കുകയാണ്. എത്ര ബൃഹത്തായ പരിശ്രമം.. എത്ര ഭംഗിയായി നിര്വഹിച്ചു.. നിങ്ങള് ഓരോരുത്തരും ഈ സിനിമ കാണണം, ഈ കലര്പ്പില്ലാത്ത സിനിമാസംവിധായകന് കൂടുതല് കരുത്താര്ന്ന ചിറകുകള് നല്കണം.. മനസില് സ്നേഹവും അഭിമാനവും നിറയുന്നു..” അനൂപ് കുറിപ്പില് പറഞ്ഞു.
ആക്ഷന് പ്രാധാന്യം നല്കി ഒരുക്കുന്ന ചിത്രത്തില് ഏറെ പ്രാധാന്യമുള്ള ഗസ്റ്റ് റോളില് എബ്രഹാം പാലയ്ക്കല് എന്ന കഥാപാത്രമായാണ് മമ്മൂട്ടി എത്തുന്നത്. ചിത്രത്തിലെ താരത്തിന്റെ ലുക്ക് വൈറലായിരുന്നു. മമ്മൂട്ടിയ്ക്ക് പുറമേ പൃഥ്വിരാജ്, ഉണ്ണി മുകുന്ദന്, ആര്യ എന്നിവരും ചിത്രത്തിലുണ്ട്. 60 ലധികം പുതുമുഖങ്ങളും പതിനെട്ടാം പടിയില് അണിനിരക്കുന്നുണ്ട്. ശങ്കര് രാമകൃഷ്ണനാണ് ചിത്രത്തിന് തിരക്കഥയും ഒരുക്കിയിരിക്കുന്നത്.