അഞ്ചാംപാതിര സിനിമ കണ്ടവര്‍ മറക്കാത്ത ഒരു കഥാപാത്രമാണ് “സൈക്കോ സൈമണ്‍”. സിനിമ അവസാനിച്ചിട്ടും ആളുകളെ വേട്ടയാടിയ ആ കഥാപാത്രത്തെ അവതരിപ്പിച്ചത് മേക്കപ്പ് ആര്‍ടിസ്റ്റ് ആയി സിനിമയിലെത്തിയ സുധീര്‍ സൂഫി ആണ്. അഞ്ചാം പാതിരയുടെ അസോസിയേറ്റ് ഡയറക്ടറായ അമല്‍ സി. ബേബിയാണ് കൊടുങ്ങല്ലൂര്‍ സ്വദേശിയായ സുധീറിനെ ചിത്രത്തിലേയ്ക്ക് തിരഞ്ഞെടുക്കുന്നത്.
ചെറിയ വേഷമായിരുന്നെങ്കിലും പ്രേക്ഷകരെ വിറപ്പിച്ച കഥാപാത്രമായിരുന്നു സുധീറിന്റെ സൈക്കോ സൈമണ്‍. സംവിധായകന്‍ മിഥുന്‍ മാനുവല്‍ തന്ന പിന്തുണ വളരെ വലുതായിരുന്നുവെന്ന് സുധീര്‍ പറയുന്നു. നാട്ടിലൊക്കെ ഒരുപാട് പേര്‍ തിരിച്ചറിഞ്ഞ് തുടങ്ങിയെന്നും പ്രേക്ഷകര്‍ കഥാപാത്രം ഏറ്റെടുത്തു എന്നറിയുന്നതില്‍ സന്തോഷമുണ്ടെന്നും സുധീര്‍ പ്രതികരിച്ചു.
തിയേറ്ററുകളിലെത്തിയപ്പോള്‍ തന്നെ ഏറെ ചര്‍ച്ച ചെയ്യപ്പെട്ട ചിത്രം അഞ്ചാം പാതിര മിനിസ്‌ക്രീനിലെത്തിയതിനു ശേഷവും കൂടുതല്‍ നിരീക്ഷണങ്ങള്‍ക്ക് വിധേയമാവുകയാണ്. കേരളക്കരയെ ഞെട്ടിച്ച നന്തന്‍കോട് കൂട്ട കൊലപാതക കേസിലെ പ്രതി കേഡല്‍ ജീന്‍സന്റെ ജീവിതത്തെ ആസ്പദമാക്കിയാണ് “സൈക്കോ സൈമണ്‍” രൂപം കൊണ്ടതെന്നാണ് ഒരു വിഭാഗം പറയുന്നത്.
