പ്രിയ താരത്തിന്റെ അപ്രതീക്ഷിത വിയോഗത്തിന്റെ ഞെട്ടലിലാണ് സിനിമാലോകവും പ്രേക്ഷകരും. ചുരുക്കം കഥാപാത്രങ്ങളിലൂടെ പ്രേക്ഷക ഹൃദയങ്ങളിലേക്ക് ചേക്കേറിയ താരം ഒരുപാട് കഥാപാത്രങ്ങള് ബാക്കിയാക്കിയാണ് വിട വാങ്ങിയത്. പുതിയ ചിത്രം പീസിന്റെ ചിത്രീകരണത്തിനായി തൊടുപുഴയില് എത്തിയതായിരുന്നു താരം.
ഷൂട്ടിംഗ് ഇടവേളയില് സുഹൃത്തുക്കള്ക്കൊപ്പം ജലാശയത്തില് കുളിക്കാനിറങ്ങിയ താരം ആഴമുള്ള കയത്തിലേക്ക് അബദ്ധത്തില് വീണു പോവുകയായിരുന്നു. ജലാശയങ്ങള് ഏറെ ഇഷ്ടപ്പെടുന്ന അനിലിന്റെ പഴയൊരു പോസ്റ്റാണ് ആരാധകരുടെ ശ്രദ്ധയിലേക്ക് വേദനിപ്പിച്ചു കൊണ്ടെത്തുന്നത്.
2017 ഡിസംബര് 29-ന് പങ്കുവച്ച പോസ്റ്റാണിത്. മൂന്ന് വര്ഷം മുമ്പ് ഡിസംബറില്, ഇന്നലെ അപകടമുണ്ടായ അതേ മലങ്കര ജലാശയത്തില് കുളിക്കാനിറങ്ങിയ ചിത്രമാണ് അനില് പങ്കുവെച്ചത്. “”ഇപ്പം നദിയുടെ സീസണാണല്ലോ .. മായയെങ്കി മായ നദിയെങ്കി നദി, മുങ്ങാം കൂടെ മുങ്ങാന് ആരേലും ഉണ്ടേ ഇപ്പം മുങ്ങണം””എന്നാണ് ചിത്രത്തിനൊപ്പം അദ്ദേഹം കുറിച്ചത്. ആരാധകരുടെ കമന്റുകള്ക്ക് മറുപടിയും താരം കൊടുത്തിട്ടുണ്ട്.
മുങ്ങിപ്പോയാലോ ചേട്ടാ എന്ന കമന്റിന് മുങ്ങണം എന്നായിരുന്നു താരത്തിന്റെ മറുപടി. അയ്യോ മുങ്ങല്ലേ എന്ന ഒരു സുഹൃത്തിന്റെ കമന്റിന് ഒന്നു രണ്ട് തവണ മുങ്ങി പൊങ്ങിയതാ, അതോണ്ട് രക്ഷപ്പെട്ടു പോം എന്നാണ് അനിലിന്റെ മറുപടി. തൊടുപുഴയില് ഷൂട്ടിംഗിനിടയിലെ ഒരു ദിവസമാണ് ഇതെന്നും കമന്റുകളില് വ്യക്തമാക്കിയിട്ടുണ്ട്.
