അമിതാഭ് ബച്ചനെയും ജയാ ബച്ചനെയും നിരവധി സന്ദര്‍ഭങ്ങളില്‍ വിമര്‍ശിച്ചിട്ടുള്ള വ്യക്തിയാണ് സമാജ് വാദി പാര്‍ട്ടി മുന്‍ നേതാവ് അമര്‍ സിങ്. അമിതാഭ് ബച്ചനും ജയയും അകന്നാണ് താമസിക്കുന്നതെന്നും ജയയും ഐശ്വര്യയും തമ്മില്‍ നിരവധി പ്രശ്നങ്ങളുണ്ടെന്നും അമര്‍ സിങ് പൊതുവേദികളില്‍ വരെ പറഞ്ഞിട്ടുണ്ട്. എന്നാല്‍ ഇപ്പോഴിതാ തന്റെ പഴയ പ്രതികരണങ്ങളില്‍ പശ്ചാത്തപിച്ച് രംഗത്തെത്തിയിരിക്കുകയാണ് അമര്‍ സിങ്. ട്വിറ്ററിലൂടെയാണ് അദ്ദേഹത്തിന്റെ പ്രതികരണം.
അമര്‍ സിങ്ങിന്റെ പിതാവിന്റെ ചരമ വാര്‍ഷിക ദിനത്തില്‍ സന്ദേശമയച്ച അമിതാഭ് ബച്ചന് നല്‍കിയ മറുപടിയിലാണ് അമര്‍ സിങ് ഇക്കാര്യം പറയുന്നത്. ജീവിതത്തിനും മരണത്തിനും ഇടയിലുള്ള യുദ്ധത്തിലാണ് താനെന്നും അദ്ദേഹം തന്റെ ട്വീറ്റില്‍ പറയുന്നു.
“ഇന്ന് എന്റെ അച്ഛന്റെ ചരമവാര്‍ഷികമാണ്. എനിക്ക് അമിത് ജിയുടെ സന്ദേശം ലഭിച്ചു. ജീവിതത്തിനും മരണത്തിനും ഇടയിലുള്ള യുദ്ധത്തിനിടയിലാണ് ഇപ്പോള്‍. അമിത് ജിക്കും കുടുംബത്തിനും എതിരെ ഞാന്‍ പറഞ്ഞ കാര്യങ്ങളില്‍ ഇപ്പോള്‍ ഖേദിക്കുന്നു. കുറ്റബോധം തോന്നുന്നു.എന്നിങ്ങനെയാണ് അമര്‍ സിങിന്റെ ട്വീറ്റ്.