‘ഭീഷ്മപർവ്വ’ത്തിന് ശേഷം അമൽ നീരദ് സംവിധാനം ചെയ്യുന്ന ഏറ്റവും പുതിയ ചിത്രത്തിന്റെ ക്യാരക്ടർ പോസ്റ്ററുകൾ പുറത്ത്. ഫഹദ് ഫാസിൽ, കുഞ്ചാക്കോ ബോബൻ, ജ്യോതിർമയി, ഷറഫുദ്ദീൻ തുടങ്ങിയവരാണ് ചിത്രത്തിൽ പ്രധാന കഥാപാത്രങ്ങളായെത്തുന്നത്.
പതിനൊന്ന് വർഷങ്ങൾക്ക് ശേഷം ജ്യോതിർമയി മലയാളത്തിലേക്ക് തിരിച്ചെത്തുന്ന ചിത്രം കൂടിയാണിത്. നാളെയാണ് ചിത്രത്തിന്റെ ടൈറ്റിൽ പോസ്റ്റർ പുറത്തുവരുന്നത്. കയ്യിൽ തോക്കേന്തിയ ഫഹദിന്റെയും കുഞ്ചാക്കോ ബോബന്റെയും ജ്യോതിർമയിയുടെയും കഥാപാത്രങ്ങളാണ് പോസ്റ്ററുകളിൽ ഉള്ളത്. ഇതിൽ നിന്നെല്ലാം വ്യത്യസ്തമാണ് ഷറഫുദ്ദീന്റെ ക്യാരക്ടർ പോസ്റ്റർ.
ലാജോ ജോസ് എഴുതിയ ‘റൂത്തിന്റെ ലോകം’ എന്ന പുസ്തകത്തെ ആസ്പദമാക്കിയാണ് സിനിമ ഒരുങ്ങുന്നതെന്നും റിപ്പോർട്ടുകളുണ്ട്. അമൽ നീരദ് പ്രൊഡക്ഷൻസും ഉദയ സ്റ്റുഡിയോസും ചേർന്നാണ് ചിത്രം നിർമ്മിക്കുന്നത്. സുഷിൻ ശ്യാം സംഗീത സംവിധാനം നിർവഹിക്കുന്ന ചിത്രത്തിന് വേണ്ടി ആനന്ദ് സി ചന്ദ്രനാണ് ഛായാഗ്രഹണം നിർവഹിക്കുന്നത്.
അതേസമയം പാർക്ക് ചാൻ വൂക്കിന്റെ 2003-ൽ പുറത്തിറങ്ങിയ കൊറിയൻ റിവഞ്ച് ത്രില്ലർ ചിത്രമായ ‘ഓൾഡ് ബോയ്’ എന്ന ചിത്രത്തിന്റെ പോസ്റ്ററുകളുടെ അതേ പാറ്റേണിലാണ് അമൽ നീരദ് പുതിയ പോസ്റ്ററുകൾ ഇറക്കിയിരിക്കുന്നതെന്നും ശ്രദ്ധേയമായ കാര്യമാണ്.
അതേസമയം മലയാളത്തിൽ മാസ് സിനിമകൾക്ക് മറ്റൊരു ഭാഷ്യം നൽകിയ ചിത്രമായിരുന്നു അമൽ നീരദിന്റെ മമ്മൂട്ടി ചിത്രം ‘ബിഗ് ബി’. ചിത്രത്തിന്റെ രണ്ടാം ഭാഗമായ ബിലാൽ പ്രഖ്യാപിച്ചിരുന്നെങ്കിലും പിന്നീട് യാതൊരുവിധ അപ്ഡേറ്റുകളും ലഭ്യമായിരുന്നില്ല. അതിനിടെയിലായിരുന്നു ഭീഷ്മപർവ്വം ഒരുങ്ങിയത്. അമൽ നീരദിന്റെ തന്നെ ഏറ്റവും കളക്ഷൻ നേടിയ ചിത്രം കൂടിയായയിരുന്നു ഭീഷ്മപർവ്വം.