നവംബര് മാസം സൂപ്പര് ഹിറ്റ് സിനിമകളുടെ ഒടിടി റിലീസുകളാണ് വരാനിരിക്കുന്നത്. മലയാളത്തില് നിന്നും ടൊവിനോയുടെ സൂപ്പര്ഹിറ്റ് ചിത്രം ‘അജയന്റെ രണ്ടാം മോഷണം’ ആദ്യമെത്തും. നവംബര് എട്ട് മുതല് ഹോട്ട്സ്റ്റാറിലൂടെ ചിത്രത്തിന്റെ സ്ട്രീമിങ് ആരംഭിക്കും. ആസിഫ് അലിയുടെ കിഷ്കിന്ധാ കാണ്ഡവും നവംബര് രണ്ടാം വാരം ഹോട്ട്സ്റ്റാറിലൂടെ എത്തിയേക്കും.
സെപ്റ്റംബര് 12ന് തിയേറ്ററിലെത്തിയ അജയന്റെ രണ്ടാം മോഷണം തിയേറ്ററുകളില് വന് വിജയമാണ് നേടിയത്. ടൊവിനോ ആദ്യമായി ട്രിപ്പിള് റോളില് എത്തിയ ചിത്രം 100 കോടി ക്ലബ്ബില് ഇടംപിടിച്ചിരുന്നു. 30 കോടി ബജറ്റിലാണ് ചിത്രം ഒരുക്കിയത്. നവാഗതനായ ജിതിന് ലാല് സംവിധാനം ചെയ്ത ചിത്രത്തിന് തിരക്കഥ രചിച്ചിരിക്കുന്നത് സുജിത് നമ്പ്യാരാണ്. മാജിക് ഫ്രെയിംസിന്റെ ബാനറില് ലിസ്റ്റിന് സ്റ്റീഫനും യുജിഎം മോഷന് പിക്ച്ചേഴ്സിന്റെ ബാനറില് ഡോക്ടര് സക്കറിയ തോമസും ചേര്ന്നാണ് നിര്മ്മിച്ചിരിക്കുന്നത്.
കുഞ്ഞിക്കേളു, മണിയന്, അജയന് എന്നീ മൂന്ന് കഥാപാത്രങ്ങളായാണ് ടൊവിനോ ചിത്രത്തില് വേഷമിട്ടത്. കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി എന്നിവരാണ് ചിത്രത്തില് നായികമാരായി എത്തിയത്. ഇതില് സുരഭി ലക്ഷ്മിയുടെ കഥാപാത്രം ആയിരുന്നു ഏറെ ശ്രദ്ധ നേടിയത്.
ബേസില് ജോസഫ്, ജഗദീഷ്, ഹരീഷ് ഉത്തമന്, കബീര് സിങ്, പ്രമോദ് ഷെട്ടി, രോഹിണി എന്നിവരും ചിത്രത്തില് പ്രധാന വേഷങ്ങളില് എത്തി. ജോമോന് ടി ജോണ് ആണ് ചായാഗ്രാഹകന്. എഡിറ്റിംഗ് നിര്വഹിച്ചത് ഷമീര് മുഹമ്മദാണ്. സംഗീതം ദിപു നൈനാന് തോമസ്.
തിയേറ്ററുകളില് ഏറെ പ്രശംസ നേടിയ ആസിഫ് അലി ചിത്രമാണ് ‘കിഷ്കിന്ധാ കാണ്ഡം.’ ദിന്ജിത്ത് അയ്യത്താന് സംവിധാനം ചെയ്ത കിഷ്കിന്ധാകാണ്ഡം ഓപ്പണിങ് ദിനത്തില് തന്നെ ശ്രദ്ധ നേടിയിരുന്നു. ആദ്യ ദിനം 45 ലക്ഷം രൂപയായിരുന്നു ചിത്രത്തിന് ലഭിച്ച കളക്ഷന്. തുടര്ന്ന് സിനിമ തിയേറ്ററില് കത്തിക്കയറുകയായിരുന്നു. 75.25 കോടി രൂപയാണ് സിനിമ ബോക്സ് ഓഫീസില് നിന്നും നേടിയത്.
വിജയരാഘവന്, അപര്ണ്ണ ബാലമുരളി എന്നിവരാണ് സിനിമയില് പ്രധാന കഥാപാത്രങ്ങളായി എത്തുന്നത്. ജഗദീഷ്, അശോകന്, നിഷാന്, വൈഷ്ണവി രാജ്, മേജര് രവി, നിഴല്കള് രവി, ഷെബിന് ബെന്സണ്, കോട്ടയം രമേഷ്, ബിലാസ് ചന്ദ്രഹാസന്, മാസ്റ്റര് ആരവ്, ജിബിന് ഗോപിനാഥ് എന്നിവരാണ് സിനിമയിലെ മറ്റ് അഭിനേതാക്കള്. കഥ, തിരക്കഥ, സംഭാഷണം, ഛായാഗ്രഹണം എന്നിവ ബാഹുല് രമേഷ് ആണ് നിര്വഹിക്കുന്നത്. ഗുഡ്വില് എന്റര്ടെയന്മെന്റ്സിന്റെ ബാനറില് ജോബി ജോര്ജ് ആണ് സിനിമ നിര്മ്മിച്ചത്.
രജനികാന്തിന്റെ വേട്ടയ്യന് നവംബര് എട്ടിന് ആമസോണ് പ്രൈമിലൂടെ റിലീസ് ചെയ്യും. തമിഴ് ചിത്രം ‘ലബ്ബര് പന്ത്’ ഹോട്ട്സ്റ്റാറിലൂടെ ഇതിനോടകം സ്ട്രീമിങ് ആരംഭിച്ചു കഴിഞ്ഞു. ജീവയുടെ തമിഴ് ഹൊറര് ത്രില്ലര് ‘ബ്ലാക്ക്’ ആമസോണ് പ്രൈമിലും ലഭ്യമാണ്.