ചിയോതിക്കാവിലെ മായാക്കാഴ്ചകള് പ്രേക്ഷകര് ഏറ്റെടുത്തതോടെ തിയേറ്ററില് വന് വിജയമായി മാറി ‘അജയന്റെ രണ്ടാം മോഷണം’. സെപ്റ്റംബര് 12ന് റിലീസ് ചെയ്ത ചിത്രം 87 കോടി രൂപ തിയേറ്ററില് നേടിക്കഴിഞ്ഞു. നിര്മ്മാതാവ് ലിസ്റ്റിന് സ്റ്റീഫന് ആണ് ഈ വിവരം പങ്കുവച്ചിരിക്കുന്നത്. 30 കോടി ബജറ്റിലാണ് എആര്എം ഒരുക്കിയത്.
കുഞ്ഞിക്കേളു, മണിയന്, അജയന് എന്നീ മൂന്ന് വ്യത്യസ്ത വേഷങ്ങളിലാണ് ടൊവിനോ ചിത്രത്തില് വേഷമിട്ടത്. തമിഴ്, തെലുങ്ക്, മലയാളം ചിത്രങ്ങളിലൂടെ ശ്രദ്ധേയമായ കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി എന്നിവരാണ് ചിത്രത്തില് നായികമാരായി എത്തിയത്.
ബേസില് ജോസഫ്, ജഗദീഷ്, ഹരീഷ് ഉത്തമന്, ഹരീഷ് പേരടി, കബീര് സിങ്, പ്രമോദ് ഷെട്ടി, രോഹിണി എന്നിവരും ചിത്രത്തില് പ്രധാന വേഷങ്ങളില് എത്തിയിട്ടുണ്ട്. ജിതിന് ലാല് സംവിധാനം ചെയ്ത ചിത്രത്തിന് സുജിത് നമ്പ്യാരാണ് തിരക്കഥ ഒരുക്കിയിരിക്കുന്നത്.
മാജിക് ഫ്രെയിംസിന്റെ ബാനറില് ലിസ്റ്റിന് സ്റ്റീഫനും യുജിഎം മോഷന് പിക്ച്ചേഴ്സിന്റെ ബാനറില് ഡോക്ടര് സക്കറിയ തോമസും ചേര്ന്നാണ് അഞ്ച് ഭാഷകളില് റിലീസ് ചെയ്ത ഈ ത്രീഡി ചിത്രം നിര്മ്മിച്ചിരിക്കുന്നത്. അതേസമയം, ചിത്രത്തിന്റെ വ്യാജ പ്രിന്റ് സോഷ്യല് മീഡിയയില് ചോര്ന്നിരുന്നു.