‘ബാഹുബലി’ക്ക് ശേഷം മറ്റൊരു ബ്ലോക്ബസ്റ്റര് സൃഷ്ടിച്ച് പ്രഭാസ്. ഡിസംബംര് 22ന് തിയേറ്ററിലെത്തിയ ‘സലാര്’ ഓപ്പണിംഗ് ദിനത്തില് തന്നെ 175 കോടി രൂപ കളക്ഷന് നേടിയിരുന്നു. 1000 കോടി ക്ലബ്ബ് ചിത്രങ്ങളായ ‘പഠാന്’, ‘ജവാന്’ എന്നീ ചിത്രങ്ങളുടെയും ‘ലിയോ’യുടെയും ഓപ്പണിംഗ് കളക്ഷന് മറികടന്നാണ് സലാറിന്റെ റെക്കോര്ഡ് നേട്ടം.
ഇന്ത്യയില് നിന്നും മാത്രം 95 കോടിയാണ് ചിത്രം നേടിയത്. ബാഹുബലിക്ക് ശേഷം പ്രഭാസിന്റെതായി പുറത്തെത്തിയ ‘സാഹോ’, ‘രാധേശ്യാം’, ‘ആദിപുരുഷ്’ എന്നീ സിനിമകള് വന് ദുരന്തമായിരുന്നു. സലാറിന്റെ തകര്പ്പന് വിജയത്തോടെ ഇന്ത്യന് സിനിമയില് വമ്പന് തിരിച്ചുവരവാണ് പ്രഭാസ് നടത്തിയിരിക്കുന്നത്.
നഷ്ടമായ താരശോഭ തിരിച്ചുപിടിച്ചതിനൊപ്പം പ്രതിഫലത്തിലും വര്ധനവ് വരുത്തിയിരിക്കുകയാണ്. സലാര് അടക്കമുള്ള ചിത്രങ്ങളില് നൂറ് കോടിക്ക് മുകളിലായിരുന്നു പ്രഭാസിന്റെ പ്രതിഫലം. ഇതിലും കൂടുതലാണ് താരത്തിന്റെ വരാനിരിക്കുന്ന രണ്ട് ചിത്രങ്ങളില് എന്നാണ് റിപ്പോര്ട്ടുകള്.
‘കല്കി 2898 എഡി’ എന്ന ചിത്രമാണ് പ്രഭാസിന്റെ ഇനി വരാനിരിക്കുന്ന ചിത്രം. നാഗ് അശ്വിന് സംവിധാനം ചെയ്യുന്ന ചിത്രത്തില് ദീപിക പദുകോണ് ആണ് നായികയായി എത്തുന്നത്. അമിതാഭ് ബച്ചനും പ്രധാന വേഷത്തിലെത്തുന്ന ചിത്രത്തില് വില്ലന് കഥാപാത്രത്തെ അവതരിപ്പിക്കുന്നത് കമല് ഹാസന് ആണ്.
ചിത്രത്തില് പ്രഭാസ് വാങ്ങുന്ന പ്രതിഫലം 250 കോടിക്ക് മുകളിലാണെന്നാണ് റിപ്പോര്ട്ടുകള്. 600 കോടി രൂപയാണ് ചിത്രത്തിന്റെ ആകെ ബജറ്റ് എന്നതും ശ്രദ്ധേയമാണ്. ‘കണ്ണപ്പ’ എന്ന സിനിമയില് ശിവഭഗവാനയി കാമിയോ റോളിലും താരം എത്തുന്നുണ്ട്.