ശ്രീനാഥ് ഭാസിയെ പ്രധാനകഥാപാത്രമാക്കി നവാഗതനായ ജോ ജോർജ് സംവിധാനം ചെയ്യുന്ന പുതിയ ചിത്രം ‘ആസാദി’യുടെ സെക്കന്റ് ലുക്ക് പോസ്റ്റർ പുറത്തുവിട്ട് അണിയറപ്രവർത്തകർ . മലയാള സിനിമയിലെ ആക്ഷൻ നായികയായിരുന്ന വാണി വിശ്വനാഥ് ഒൻപത് വർഷങ്ങൾക്ക് ശേഷം മലയാള സിനിമയിലേക്ക് മടങ്ങിയെത്തുന്ന ചിത്രം കൂടിയാണ് ആസാദി.
വാണി വിശ്വനാഥിന്റെ ക്യാരക്ടർ പോസ്റ്ററാണ് ഇപ്പോൾ പുറത്തുവിട്ടിരിക്കുന്നത്. മലയാള സിനിമയിൽ ശക്തമായ വനിതാ പൊലീസ് വേഷങ്ങളിൽ തിളങ്ങി കയ്യടി വാങ്ങിയിട്ടുള്ള താരമാണ് വാണി വിശ്വനാഥ്. പുതിയ സിനിമയിലും വാണി പ്രധാനപ്പെട്ട ഒരു പൊലീസ് കഥാപാത്രത്തെയാണ് അവതരിപ്പിക്കുന്നത്. സംവിധായകൻ ജോ ജോർജ് ഇൻസ്റ്റഗ്രാമിലൂടെയാണ് പോസ്റ്റർ പങ്കുവെച്ചിരിക്കുന്നത്.
ശ്രീനാഥ് ഭാസിയുടെ അൻപതാമത് ചിത്രം കൂടിയാണ് സാഗർ തിരക്കഥയെഴുതുന്ന ആസാദി. സത്യം മാത്രമേ ബോധിപ്പിക്കൂ, കനകരാജ്യം, കുമ്പാരീസ്, വിക്രാ തുടങ്ങിയ ചിത്രങ്ങളുടെ സംവിധായകൻ കൂടിയാണ് സാഗർ.
ലാൽ, സൈജു കുറുപ്പ്, രവീണ രവി, ടി. ജി രവി, രാജേഷ് ശർമ, ജിലു ജോസഫ് തുടങ്ങിയവരും അണിനിരക്കുന്നു. ഹരി നാരായണന്റെ വരികൾക്ക് വരുൺ ഉണ്ണിയാണ് സംഗീതം നൽകിയിരിക്കുന്നത്. ലിറ്റിൽ ക്രൂ പ്രൊഡക്ഷൻസിന്റെ ബാനറിൽ ഫൈസൽ രാജയാണ് ആസാദി നിർമ്മിക്കുന്നത്.