ജീവിതത്തില് താന് നേരിട്ട് കാണണമെന്ന് ആഗ്രഹിച്ച ഒരേയൊരു നടനാണ് ബേസില് ജോസഫ് എന്ന് നടി ഷീല. ജെഎഫ്ഡബ്ല്യു ‘മാന് ഓഫ് ദി ഇയര്’ പുരസ്കാരം ബേസിലിന് കൈമാറിയ ശേഷം ഷീല പറഞ്ഞ വാക്കുകളാണ് ശ്രദ്ധ നേടുന്നത്. ബേസിലിന്റെ ആദ്യ ചിത്രം മുതല് ‘പൊന്മാന്’ വരെ എല്ലാം ഒന്നിലേറെ തവണ കണ്ടിട്ടുണ്ടെന്നും എല്ലാ വീട്ടിലെയും ഓമനക്കുട്ടനാണ് ബേസിലെന്നുമാണ് ഷീല പറയുന്നത്.
”ഞങ്ങളുടെ മലയാള സിനിമയിലെ കണ്ണിലുണ്ണിയാണ് ബേസില് ജോസഫ്. എല്ലാ വീടുകളിലും ഒരു ഓമനക്കുട്ടനാണ്. ബേസിലിനെ അവരുടെ വീട്ടിലെ ഒരാളായാണ് എല്ലാവരും വിചാരിക്കുന്നത്. ഇദ്ദേഹത്തിന്റെ ആദ്യത്തെ പടം മുതല് ‘പൊന്മാന്’ വരെ എല്ലാ ചിത്രങ്ങളും രണ്ട് പ്രാവശ്യം ഞാന് കണ്ടിട്ടുണ്ട്.”
”ഗുരുവായൂര് അമ്പലനടയില് സിനിമയില് പൃഥ്വിരാജും ഇങ്ങേരും കുടിച്ചിങ്ങനെ ഇരിക്കുന്ന ഒരു സീനുണ്ട്. എന്റെ ദൈവമേ, എന്തൊരു അഭിനയമാണ്. അത് പിന്നെയും പിന്നെയും ഓടിച്ച് ഞാന് രണ്ടും മൂന്നും പ്രാവശ്യം കണ്ടു. ഇനിയും ഒരുപാട് പടങ്ങള് അഭിനയിക്കണം. കുറേ കുറേ പ്രായം ആവുമ്പോള് ഡയറക്ഷന് പോയാല് മതി കേട്ടോ.”
”ഞാന് ഇതുവരേയും ഒരു നടനെ നേരിട്ട് കാണണം എന്ന് ആഗ്രഹിച്ചിട്ടില്ല. ആദ്യമായി ഞാന് ആഗ്രഹിച്ച ഒരാള് ഇങ്ങേരേയുള്ളൂ” എന്നാണ് ഷീലയുടെ പറഞ്ഞത്. ഷീലയുടെ വാക്കുകള്ക്ക് നന്ദി അറിയിച്ച ബേസില് താന് മറ്റെന്തൊക്കെയോ പറയണമെന്ന് വിചാരിച്ചിരിക്കുകയായിരുന്നുവെന്നും ഷീലയുടെ നല്ല വാക്കുകള് കേട്ടതോടെ എല്ലാം മറന്നുപോയെന്നും പറഞ്ഞു.