പതിനഞ്ചാം വയസ്സില് ആദ്യ സിനിമയായ ‘നഖക്ഷതങ്ങളി’ലൂടെ മികച്ച അഭിനേത്രിക്കുള്ള ദേശീയ പുരസ്കാരം നേടിയ നായിക. 7 വര്ഷം മാത്രം നീണ്ടു നിന്ന അഭിനയ ജീവിതം. മലയാളം, തമിഴ്, തെലുങ്ക്, കന്നഡ ഭാഷകളിലായി ഇരുപത്തിയേഴോളം സിനിമകള്. സജീവമായിരുന്ന ചുരുങ്ങിയ കാലഘട്ടത്തിനുള്ളില് ഹരിഹരന്, എംടി, ലോഹിതദാസ്, സിബി മലയില്, കമല്, പ്രിയദര്ശന് തുടങ്ങി നിരവധി പ്രഗത്ഭ സംവിധായകരുടെ സിനിമകളില് എത്തി മലയാളി പ്രേക്ഷകരുടെ ഇഷ്ട നടിയായി മാറി. മലയാളത്തെ വിസ്മയിപ്പിച്ച നടി മോനിഷയുടെ ഓര്മ്മകള്ക്ക് ഇന്ന് 30 വയസ്സ്. മരിച്ച് മൂന്ന് പതിറ്റാണ്ട് പിന്നിടുമ്പോഴും വെള്ളിത്തിരയില് മായാത്ത മുദ്ര പതിപ്പിച്ച മോനിഷ ഇപ്പോഴും മലയാളത്തിന് തീരാനോവാണ്.
ചുരുങ്ങിയ കാലത്തെ അഭിനയ ജീവിതമായിരുന്നെങ്കിലും ഒരായുഷ്കാലത്തേക്കുള്ള ഓര്മ്മകള് അടയാളപ്പെടുത്തിയാണ് മോനിഷ മടങ്ങിയത്. എംടി വാസുദേവന് നായരാണ് മോനിഷയുടെ സിനിമാ പ്രവേശനത്തിന് കാരണമായത്.
1971ല് ഉണ്ണിയുടെയും ശ്രീദേവിയുടെയും മകളായി ആലപ്പുഴയിലാണ് മോനിഷ ജനിച്ചത്. അച്ഛന് ബാംഗ്ലൂരില് തുകല് ബിസിനസ് ആയിരുന്നതിനാല് മോനിഷയുടെ ബാല്യം ബാംഗ്ലൂരിലായിരുന്നു. അമ്മ ശ്രീദേവി നര്ത്തകിയും. മോനിഷ പഠിച്ചതെല്ലാം ബാംഗൂരിലായിരുന്നു. സൈക്കോളജി ബിരുദധാരിയായിരുന്ന നടി അഭിനയത്തില് മാത്രമല്ല നൃത്തം, സംഗീതം എന്നിങ്ങനെ വിവിധ മേഖലകളില് പ്രതിഭ തെളിയിച്ചിട്ടുണ്ട്. കുട്ടിക്കാലം തൊട്ടു നൃത്തം പഠിച്ചിരുന്ന മോനിഷയ്ക്ക് കര്ണാടക ഗവണ്മെന്റ് ഭരതനാട്യ നര്ത്തകര്ക്കായി നല്കുന്ന ‘കൗശിക അവാര്ഡ് സമ്മാനിച്ചിരുന്നു.
അധിപന്, ആര്യന്, പെരുന്തച്ചന്, കമലദളം തുടങ്ങി തൊട്ടതെല്ലാം പൊന്നാക്കിയായിരുന്നു മോനിഷയുടെ കലാജീവിതം. തമിഴിലും കന്നടയിലുമെല്ലാം ആരാധകര്. സൗന്ദര്യവും അഭിനയമികവും നൃത്തത്തിലെ പ്രാവീണ്യവും മോനിഷയെ ജനപ്രിയ നായികയാക്കി. കടവ്, ചമ്പക്കുളം തച്ചന്, കുടുംബസമേതം തുടങ്ങിയ സിനിമകളിലും മോനിഷയുടെ അഭിനയമികവ് മലയാളം കണ്ടറിഞ്ഞു. മലയാളത്തിനു പുറമെ ‘പൂക്കള് വിടും ഇതള്’, ‘ദ്രാവിഡന്’ തുടങ്ങിയ തമിഴ് സിനിമകളിലും രാഘവേന്ദ്ര രാജ്കുമാര് നായകനായി അഭിനയിച്ച ‘ചിരംജീവി സുധാകര്’ എന്ന കന്നട സിനിമയിലും മോനിഷ അഭിനയിച്ചിട്ടുണ്ട്.
സിനിമയില് കൂടുതല് ഉയരങ്ങളിലേക്ക് കുതിക്കുന്നതിനിടെ അപ്രതീക്ഷിതമായി ആ യാത്ര അവസാനിച്ചു. ചേര്ത്തല എക്സറേ കവലയില് നിന്ന് മോനിഷയുടെ കാര് മരണത്തിന്റെ പാതയിലേക്ക് കുതിച്ചു. 1992 ഡിസംബര് അഞ്ചിന് ‘ചെപ്പടിവിദ്യ’ എന്ന സിനിമയുടെ ചിത്രീകരണം നടക്കുന്നതിനിടയില് മോനിഷയും അമ്മയും സഞ്ചരിച്ചിരുന്ന കാര് ആലപ്പുഴയ്ക്കടുത്തുള്ള ചേര്ത്തലയില് വച്ചു മറ്റൊരു വാഹനവുമായി കൂട്ടിയിടിച്ചുണ്ടായ അപകടത്തിലാണ് താരം വിട പറഞ്ഞത്.