ലോക്ഡൗണില്‍ ക്ലേശിക്കുന്ന തമിഴ് സിനിമാമേഖലയിലെ ദിവസ വേതനക്കാര്‍ക്കാര്‍ക്ക് ധനസഹായവുമായി നിരവധി താരങ്ങള്‍ എത്തിയിരുന്നു. ഇപ്പോഴിതാ നടന്‍ യോഗി ബാബുവും സഹായ ഹസ്തവുമായി എത്തിയിരിക്കുകയാണ്. തമിഴ് സിനിമയിലെ ജൂനിയര്‍ ആര്‍ട്ടിസ്റ്റുകള്‍ക്ക് 1250 ചാക്ക് അരിയാണ് യോഗി ബാബു വിതരണം ചെയ്തത്.
യോഗി ബാബുവിന്റെ വിവാഹ റിസപ്ഷന് നേരത്തേ തീരുമാനിച്ച പ്രകാരം ആര്‍ഭാടമായി ഏപ്രില്‍ 9 ന് നടക്കേണ്ടതായിരുന്നു. വിവാഹം പെട്ടെന്നു നടത്തിയതിനാല്‍ ആരെയും ക്ഷണിക്കാന്‍ കഴിഞ്ഞിരുന്നില്ല. പകരം റിസപ്ഷന് തമിഴ്നാട് മുഖ്യമന്ത്രിയെ അടക്കം സിനിമാമേഖലയിലെ സുഹൃത്തുക്കളെ മുഴുവന്‍ ക്ഷണിച്ചുകൊണ്ട് ആഘോഷപൂര്‍വം നടത്താന്‍ ഉദ്ദേശിച്ചിരിക്കുകയായിരുന്നു. എന്നാല്‍ രാജ്യത്ത് ലോക്ഡൗണ്‍ പ്രഖ്യാപിച്ച സാഹചര്യത്തില്‍ അത് നീട്ടുവെക്കുകയായിരുന്നു. പകരം അതേദിവസം സത്പ്രവൃത്തിയുമായി നടന്‍ രംഗത്തു വരികയായിരുന്നു.
ഫെബ്രുവരി ആദ്യവാരമായിരുന്നു യോഗി ബാബുവിന്റെ വിവാഹം. രജനികാന്ത് ചിത്രമായ “ദര്‍ബാര്‍” ആണ് താരത്തിന്റെതായി ഒടുവില്‍ പുറത്തിറങ്ങിയ ചിത്രം. ധനുഷ് നായകനാകുന്ന “കര്‍ണന്‍”, “താനാ” എന്നിവയാണ് റിലീസിനൊരുങ്ങുന്ന മറ്റു സിനിമകള്‍.
