നടി തുനിഷ ശര്മ്മ ജീവനൊടുക്കിയ സംഭവത്തില് സഹനടന് ഷീസാന് മുഹമ്മദ് ഖാനെ അറസ്റ്റ് ചെയ്തു. ആത്മഹത്യാപ്രേരണാക്കുറ്റം ചുമത്തിയാണ് ഷീസാനെ പൊലീസ് അറസ്റ്റ് ചെയ്തത്. ഇവര് തമ്മില് പ്രണയത്തിലായിരുന്നുവെന്നും ബന്ധം തകര്ന്നതാണ് തുനിഷയെ ആത്മഹത്യയിലേക്ക് നയിച്ചത് എന്നുമാണ് റിപ്പോര്ട്ട്.
‘അലിബാബ: ദസ്താന് ഇ-കാബുള്’ എന്ന സീരിയലിന്റെ സെറ്റിലെ മേക്കപ്പ് റൂമിലാണ് തുനിഷ തൂങ്ങി മരിച്ചത്. മുറിയില് കയറിയ നടി ഏറെ നേരം കഴിഞ്ഞും പുറത്തു വരാതിരുന്നതിനെ തുടര്ന്ന് കതക് പൊളിച്ച് അകത്തു കയറിയപ്പോഴാണ് തുനിഷയെ തൂങ്ങിയ നിലയില് കണ്ടെത്തിയത്.
ഉടന് തന്നെ ആശുപത്രിയില് എത്തിച്ചെങ്കിലും മരണം സംഭവിച്ചിരുന്നു. നടിയുടെ മൊബൈല് ഫോണ് വിശദ പരിശോധനയ്ക്കായി പൊലീസ് കസ്റ്റഡിയില് എടുത്തിട്ടുണ്ട്. സെറ്റിലെ സിസിടിവി ദൃശ്യങ്ങളും പൊലീസ് പരിശോധിക്കും.
‘ഭാരത് കാ വീര് പുത്ര മഹാറാണ പ്രതാപ്’ എന്ന സീരിയലിലൂടെയാണ് തുനിഷ ടെലിവിഷന് രംഗത്തെത്തിയത്. ‘ചക്രവര്ത്തി അശോക സമ്രാട്ട്’, ‘ഗബ്ബാര് പൂഞ്ച് വാലാ’, ‘ഷേര്ഇ പഞ്ചാബ്’, ‘ഇന്റര്നെറ്റ് വാലാ ലവ്’, ‘സുബ്ഹാന് അല്ലാ’ തുടങ്ങിയ സീരിയലുകളിലും ശ്രദ്ധേയമായ വേഷങ്ങള് ചെയ്തു.
ബോളിവുഡ് ചിത്രങ്ങളിലും ചെറിയ വേഷങ്ങളില് തുനിഷ പ്രത്യക്ഷപ്പെട്ടിട്ടുണ്ട്. ‘ബാര് ബാര് ദേഖോ’ എന്ന ചിത്രത്തില് കത്രീന കൈഫിന്റെ ചെറുപ്പകാലം അവതരിപ്പിച്ചത് തുനിഷയായിരുന്നു. ‘ഫിത്തൂര്’, ‘ദബാങ് 3’, ‘കഹാനി 2’ തുടങ്ങിയ ചിത്രങ്ങളിലും വേഷമിട്ടു.