വാലന്റൈന്‍സ് ഡേയില്‍ നടനും സംവിധായകനും ലാല്‍ പങ്കുവച്ച ചിത്രം വൈറലാകുന്നു. ‘മൈ ന്യൂ വാലന്റൈന്‍’ എന്ന ക്യാപ്ഷനോടെ പങ്കുവച്ച ചിത്രമാണ് സോഷ്യല്‍ മീഡിയയില്‍ ഇപ്പോള്‍ ശ്രദ്ധ നേടുന്നത്. തന്റെ പുതിയ വാലന്റൈന്‍ എന്ന ക്യാപ്ഷനാണ് കൊടുത്തത് എങ്കിലും ഭാര്യ നാന്‍സി പോളിനൊപ്പമുള്ള ചിത്രമാണ് ലാല്‍ പങ്കുവച്ചിരിക്കുന്നത്.
പ്രണയം എന്നും പുതിയതാണ് എന്നാണ് ചിത്രവും ക്യാപ്ഷനും പങ്കുവച്ച ലാല്‍ വ്യക്തമാക്കുന്നത്. നിരവധി കമന്റുകളാണ് ചിത്രത്തിന് ലഭിച്ചു കൊണ്ടിരിക്കുന്നത്. ഓള്‍ഡ് ഈസ് ഗോള്‍ഡ്, അത് കലക്കി, ഹാപ്പി വാലന്റൈന്‍സ് ഡേ തുടങ്ങിയ കമന്റുകളാണ് ചിത്രത്തിന് താഴെ എത്തുന്നത്.
1987ല്‍ ആണ് ലാലും നാന്‍സിയും വിവാഹിതരാകുന്നത്. സംവിധായകന്‍ ജീന്‍ പോള്‍ ലാല്‍, മോണിക്ക എന്നിവരാണ് ഇവരുടെ മക്കള്‍. ബാല്യകാല സുഹൃത്തായ സിദ്ദിഖുമൊത്ത് ‘നോക്കെത്താ ദൂരത്ത് കണ്ണും നട്ട്’ എന്ന ചിത്രത്തില്‍ ഫാസിലിനൊപ്പം സഹസംവിധായകനായാണ് ലാല്‍ സിനിമാ ജീവിതം ആരംഭിക്കുന്നത്.
ഇന്ന് മലയാള സിനിമയിലെ ശ്രദ്ധേയനായ അഭിനേതാവും സംവിധായകനും തിരക്കഥാകൃത്തും നിര്‍മ്മാതാവുമാണ് ലാല്‍. ടൊവിനോ തോമസ് നായകനാകുന്ന ‘തിലകം’ ആണ് ലാലിന്റെതായി ഇനി റിലീസിന് ഒരുങ്ങുന്നത്. തമിഴില്‍ ‘സിങ്കപ്പൂര്‍ സലൂണ്‍’ എന്ന സിനിമയും ഒരുങ്ങുന്നുണ്ട്.