മോഹന്‍ലാലിന്റെ ആറാട്ട് മികച്ച പ്രതികരണം നേടി തിയറ്ററുകളില്‍ പ്രദര്‍ശനം തുടരുകയാണ്. ചിത്രത്തിലെ ‘ഒന്നാം കണ്ടം’ എന്ന ഗാനം ഏറെ ശ്രദ്ധനേടിയിരുന്നു. ഗാനത്തിന്റെ അവസാന ഭാഗത്തുള്ള മോഹന്‍ലാലിന്റെ ഡാന്‍സിന് മികച്ച പ്രതികരണമായിരുന്നു ലഭിച്ചിരുന്നത്.
ഇപ്പോഴിതാ ഈ രംഗം പരിശീലിക്കുന്ന മോഹന്‍ലാലിന്റെ വീഡിയോയാണ് സോഷ്യല്‍മീഡിയയില്‍ വൈറലാകുന്നത്. ബാക്ക്ഗ്രൗണ്ട് നൃത്തകര്‍ക്കൊപ്പം പ്രാക്ടീസ് ചെയ്യുന്ന മോഹന്‍ലാലിനെ വീഡിയോയില്‍ കാണാം. ഡാന്‍സിനൊടുവില്‍ ചുറ്റും നിന്നവര്‍ നിറഞ്ഞ കയ്യടികളോടെ താരത്തെ പ്രോത്സാഹിപ്പിക്കുന്നതും വീഡിയോയില്‍ ഉള്‍ക്കൊള്ളിച്ചിരിക്കുന്നു.
വീഡിയോ പുറത്തുവന്നതിന് പിന്നാലെ നിരവധി പേരാണ് കമന്റുകളുമായി രംഗത്തെത്തിയത്. ഈ പ്രായത്തിലും ഇത്രയും എനര്‍ജറ്റിക് ആയി ഡാന്‍സ് കളിക്കുന്ന മോഹന്‍ലാല്‍ എന്നും അഭിമാനമെന്നാണ് പലരും കുറിക്കുന്നത്. മെയ്വഴക്കം അടിപൊളി, ഏതെങ്കിലും ഒരു ഡയറക്ടര്‍മാര്‍ ലാലേട്ടനെ കൊണ്ട് ഇനി ഫുള്‍ സോങ് ഡാന്‍സ് ചെയ്യിപ്പിക്കണം..’, എന്നിങ്ങനെ പോകുന്നു മറ്റ് കമന്റുകള്‍.
ഫെബ്രുവരി 18നാണ് ആറാട്ട് റിലീസ് ചെയ്തത്. ബി ഉണ്ണികൃഷ്ണന്‍ സംവിധാനം ചെയ്ത ചിത്രത്തിന്റെ തിരക്കഥ ഒരുക്കിയിരിക്കുന്നത് ഉദയകൃഷ്ണയാണ്. ശ്രദ്ധ ശ്രീനാഥ് ആണ് മോഹന്‍ലാലിന്റെ നായികയായി എത്തുന്നത്. കെജിഎഫിലെ ‘ഗരുഡ’ എന്ന കഥാപാത്രത്തിലൂടെ ശ്രദ്ധനേടിയ രാമചന്ദ്ര രാജുവാണ് ചിത്രത്തിലെ ശ്രദ്ധേയ സാന്നിധ്യം. നെടുമുടി വേണു, സായ് കുമാര്‍, സിദ്ദിഖ്, വിജയരാഘവന്‍, ജോണി ആന്റണി, ഇന്ദ്രന്‍സ്, നന്ദു, ഷീല, സ്വാസിക, മാളവിക, രചന നാരായണന്‍കുട്ടി തുടങ്ങി വലിയ താരനിരയും ചിത്രത്തില്‍ അണിനിരക്കുന്നുണ്ട്.