വളരെ വേഗത്തില് നൂറ് കോടി ക്ലബ്ബില് എത്തുന്ന മലയാള സിനിമയായി ‘ആടുജീവിതം’. മാര്ച്ച് 28ന് തിയേറ്ററുകളില് എത്തിയ ചിത്രം 9 ദിവസങ്ങള്ക്കുള്ളിലാണ് 100 കോടി എന്ന നേട്ടത്തിലേക്ക് എത്തിയിരിക്കുന്നത്. ‘മഞ്ഞുമ്മല് ബോയ്സ്’, ‘2018’ എന്നീ ചിത്രങ്ങളെ പിന്നിലാക്കിയാണ് ആടുജീവിതം ഏറ്റവും വേഗത്തില് 100 കോടി നേടുന്ന ചിത്രമായി മാറിയിരക്കുന്നത്.
റിലീസ് ചെയ്ത് മൂന്ന് ദിവസങ്ങള് കൊണ്ടുതന്നെ വേള്ഡ് വൈഡ് ബോക്സോഫീസ് കളക്ഷനായി 50 കോടി രൂപയാണ് ചിത്രം സ്വന്തമാക്കിയത്. മലയാളത്തില് 2 ലക്ഷത്തോളം കോപ്പികള് വിറ്റഴിഞ്ഞ നോവല് കൂടിയാണ് യഥാര്ത്ഥ സംഭവവികാസങ്ങളെ ആസ്പദമാക്കി ബെന്യാമിന് എഴുതിയ ആടുജീവിതം.
നജീബ് എന്ന വ്യക്തി പ്രവാസ ജീവിതത്തില് അനുഭവിച്ച ദുരിതങ്ങളും അതിജീവനവും പ്രമേയമാക്കിയാണ് ബെന്യാമിന് ആടുജീവിതം എഴുതിയത്. ജിമ്മി ജീന് ലൂയിസ്, അമല പോള്, കെ ആര് ഗോകുല്, താലിബ് അല് ബലൂഷി, റിക്കബി എന്നിവരാണ് ചിത്രത്തിലെ മറ്റ് താരങ്ങള്. 2018 മാര്ച്ചില് കേരളത്തിലായിരുന്നു ആടുജീവിതത്തിന്റെ ചിത്രീകരണം ആരംഭിച്ചത്.
തുടര്ന്ന് ജോര്ദാന്, അള്ജീരിയ എന്നിവിടങ്ങളിലും ചിത്രീകരണം നടന്നു. ഇതിനിടയില് കോവിഡ് കാലത്ത് സംഘം ജോര്ദാനില് കുടങ്ങുകയും ചെയ്തിരുന്നു. 2022 ജൂലൈയില് ആയിരുന്നു ഷൂട്ടിംഗ് അവസാനിച്ചത്. അതേസമയം, ചിത്രത്തിന്റെ ഒ.ടി.ടി സ്ട്രീമിംഗ് വിവരങ്ങളും പുറത്തു വന്നിരുന്നു.
എന്നാല് റിലീസ് ഡേറ്റ് സംബന്ധിച്ച വിവരങ്ങള് ലഭ്യമല്ല. റിപ്പോര്ട്ടുകള് പ്രകാരം ചിത്രത്തിന്റെ അണ്കട്ട് വെര്ഷനായിരിക്കും ഒ.ടി.ടിയില് സ്ട്രീം ചെയ്യുക. ഇപ്പോള് തിയേറ്ററിലുള്ളത് 2 മണിക്കൂര് 57 മിനിറ്റ് ദൈര്ഘ്യമുള്ള വേര്ഷനാണ്.
വിഷ്വല് റൊമാന്സിന്റെ ബാനറിലാണ് ആടുജീവിതമൊരുക്കിയത്. എ.ആര് റഹ്മാന് സംഗീത സംവിധാനം നിര്വഹിക്കുന്ന ചിത്രത്തിന് വേണ്ടി റസൂല് പൂക്കുട്ടിയാണ് ശബ്ദ മിശ്രണം ചെയ്തത്. കെ.എസ്. സുനിലാണ് ചിത്രത്തിന്റെ ഛായാഗ്രാഹകന്. ശ്രീകര് പ്രസാദാണ് ചിത്രത്തിന്റെ എഡിറ്റിങ് നിര്വഹിച്ചിരിക്കുന്നത്.