ഹേമ കമ്മിറ്റി റിപ്പോർട്ട് പുറത്ത് വിടരുതെന്നാവശ്യപ്പെട്ട് നദി രഞ്ജിനി നൽകിയ ഹർജി ഹൈക്കോടതി തള്ളി. റിപ്പോർട്ട് സ്വകാര്യതയെ ബാധിക്കുന്നുവെങ്കില് സിംഗിള് ബെഞ്ചിനെ സമീപിക്കാമെന്ന് കോടതി വ്യക്തമാക്കി. അതേസമയം സിംഗിള് ബെഞ്ചിനെ സമീപിക്കുമെന്ന് രഞ്ജിനിയുടെ അഭിഭാഷകന് അറിയിച്ചു.
ജസ്റ്റിസുമാരായ എ മുഹമ്മദ് മുഷ്താഖ്, എസ് മനു എന്നിവരടങ്ങിയ ബെഞ്ചാണ് ഹര്ജിയില് വിധി പറഞ്ഞത്. റിപ്പോർട്ട് തടഞ്ഞ് വയ്ക്കണമെന്നാവശ്യപ്പെട്ട് സജിമോന് പാറയിലും രഞ്ജിനിയും നല്കിയ ഹർജികള് ഒരുമിച്ചാണ് കോടതി പരിഗണിച്ചത്. റിപ്പോര്ട്ട് പുറത്തുവിടാന് അനുമതി നല്കിയ സിംഗിള് ബെഞ്ച് വിധി റദ്ദാക്കണം. ഹേമ കമ്മിറ്റിക്ക് മുന്നില് താനും മൊഴി നല്കിയിട്ടുണ്ട്. മൊഴി പുറത്തുവിടരുതെന്ന് ആവശ്യപ്പെട്ടിരുന്നുവെന്നും ഇക്കാര്യം പാലിക്കണമെന്നുമായിരുന്നു രഞ്ജിനിയുടെ ആവശ്യം.
രഞ്ജിനിയുടെ വാദം നിലനില്ക്കുന്നതാണോ എന്നാണ് കോടതി പരിശോധിച്ചത്. രഞ്ജിനിയുടെ വാദം നിലനില്ക്കുന്നതല്ലെന്ന് സര്ക്കാരിന് വേണ്ടി ഹാജരായ അഭിഭാഷക കോടതിയെ അറിയിച്ചിരുന്നു. തന്റെ മൊഴി പുറത്തുവരരുതെന്ന് രഞ്ജിനി ഹർജി പരിഗണിക്കവെ ഹൈക്കോടതിയില് പറഞ്ഞു. മൊഴി പുറത്തുവരരുതെന്നാണോ റിപ്പോര്ട്ട് പുറത്തുവരരുതെന്നാണോ ആവശ്യമെന്ന് കോടതി ചോദിച്ചു. ഇതിന് പിന്നാലെയാണ് ഹർജി തള്ളിയത്.
ആഗസ്റ്റ് പതിനേഴിന് രാവിലെ 11ന് റിപ്പോര്ട്ട് പുറത്തുവിടും എന്നായിരുന്നു സംസ്കാരിക വകുപ്പ് ഔദ്യോഗികമായി അറിയിച്ചിരുന്നത്. വ്യക്തിഗത വിവരങ്ങള് ഒഴിവാക്കി റിപ്പോര്ട്ടിലെ 233 പേജ് കൈമാറാനായിരുന്നു സാംസ്കാരിക വകുപ്പിന്റെ തീരുമാനം. എന്നാല് വെള്ളിയാഴ്ച രാത്രിയോടെ നടി രഞ്ജിനി തടസവാദവുമായി സര്ക്കാറിനെ സമീപിച്ചതോടെയാണ് റിപ്പോര്ട്ട് പുറത്ത് വിടുന്നതില് നിന്ന് സര്ക്കാര് പിന്നോട്ട് പോയത്. രഞ്ജിനിയുടെ ഹര്ജിയില് കോടതി തീര്പ്പ് കല്പ്പിക്കുന്നത് വരെ റിപ്പോര്ട്ട് പുറത്തുവിടില്ലെന്നാണ് സര്ക്കാരിന്റെ തീരുമാനം.