റീലിസ് ദിവസം മുതൽ തിയേറ്ററുകളിൽ വിജയകരമായി പ്രദര്‍ശനം തുടരുന്ന ചിത്രമാണ് പാല്‍തു ജാന്‍വര്‍. ബേസില്‍ ജോസഫ് പ്രധാന കഥാപാത്രമായെത്തിയ ചിത്രത്തിന് പ്രേക്ഷകരില്‍ നിന്നും മികച്ച പ്രതികരണങ്ങളാണ് ലഭിച്ചത്. ഇപ്പോഴിതാ സിനിമയുടെ ഷൂട്ടിങ് ലൊക്കേഷനിലെ ചിത്രങ്ങളാണ് ബേസില്‍ തന്റെ സോഷ്യൽ മീഡിയ പേജിലൂടെ പങ്കുവെച്ചിരിക്കുന്നത്.
‘പത്തിരുപത് ദിവസം ഒരു മലയുടെ മുകളില്‍ രാത്രി മുഴുവന്‍… തണുപ്പത്ത്.. പാല്‍തു ജാന്‍വര്‍ ഡേയ്‌സ്, ‘ എന്ന അടിക്കുറിപ്പോടെയാണ് ബേസില്‍ ചിത്രങ്ങള്‍ ഫേസ്ബുക്കില്‍ പങ്കുവെച്ചിട്ടുള്ളത്. ഇന്ദ്രൻസ്, ജോണി ആന്റണി, ദീലിഷ് പോത്തൻ ക്യാമറയും ലൈറ്റിങ്ങുമൊക്കെയായി നിരവധി പേരെയും ചിത്രത്തിൽ കാണാൻ സാധിക്കും.
ചിത്രത്തില്‍ ഒരു ലൈവ് സ്റ്റോക് ഇന്‍സ്‌പെക്ടര്‍ ആയിട്ടാണ് ബേസില്‍ എത്തുന്നത്. ചിത്രം തിയേറ്ററില്‍ റീലിസിനേത്തുന്നതിന് മുന്‍പ് തന്നെ ചിത്രത്തിന്റെ പ്രൊമോ സോങ്ങും ബിഹൈന്‍ഡ് സീന്‍ വീഡിയോയുമെല്ലാം ഏറെ ജനപ്രീതി നേടിയിരുന്നു.
ഭാവന സ്റ്റുഡിയോസിന്റെ ബാനറില്‍ ദിലീഷ് പോത്തന്‍, ശ്യാം പുഷ്‌കരന്‍, ഫഹദ് ഫാസില്‍ എന്നിവര്‍ ചേര്‍ന്നാണ് പാല്‍തു ജാന്‍വര്‍ നിര്‍മിച്ചത്. ജോണി ആന്റണി, ഇന്ദ്രന്‍സ്, ദിലീഷ് പോത്തന്‍, ഷമ്മി തിലകന്‍, ശ്രുതി തുടങ്ങി നിരവധി താരങ്ങള്‍ സിനിമയിലുണ്ട്.