തെന്നിന്ത്യയുടെ പ്രിയനടി മധുബാലയും മലയാളത്തിന്റെ ഇഷ്ടനടൻ ഇന്ദ്രൻസും നായികാനായകന്മാരായി എത്തുന്ന ചിത്രം ഒരുങ്ങുന്നു. മണിരത്നത്തിൻ്റെ ‘റോജ’ എന്ന സിനിമയിലെ ‘ചിന്ന ചിന്ന ആസൈ’ എന്ന ഗാനത്തിന്റെ വരിയിലാണ് ചിത്രം ഒരുങ്ങുന്നത്.
വിഖ്യാത സംവിധായകൻ മണിരത്നം ആണ് ചിത്രത്തിന്റെ ഫസ്റ്റ്ലുക്ക് പോസ്റ്റർ പ്രകാശിപ്പിച്ചത്. നടൻ ഇന്ദ്രൻസും പോസ്റ്റർ പങ്കുവച്ചിരുന്നു. ‘ഞാൻ നായകൻ ആകുന്ന എന്റെ അടുത്ത ചിത്രം . ചിന്ന ചിന്ന ആസൈ . മധുബാല ആണ് നായിക. പൂർണ്ണമായും വാരണാസിയിൽ ചിത്രീകരിച്ച ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഇതാ നിങ്ങളിലേക്ക്!’ എന്ന കുറിപ്പോടെയാണ് നടൻ പങ്കുവച്ചത്.
ഏറെ ശ്രദ്ധ നേടിയ ഷോർട് ഫിലിമായ ‘എന്റെ നാരായണിക്ക്’ ശേഷം വർഷാ വാസുദേവ് ആണ് ചിത്രത്തിന്റെ രചനയും സംവിധാനവും നിർവഹിക്കുന്നത്. പൂർണ്ണമായും വാരണാസിയിലാണ് ചിത്രത്തിന്റെ ചിത്രീകരണം നടന്നത്. ബാബുജി പ്രൊഡക്ഷൻസിന്റെ ബാനറിൽ അഭിജിത് ബാബുജിയാണ് നിർമ്മിക്കുന്നത്.