നടന് യാഷിന്റെ ജന്മദിനത്തില് ബാനര് കെട്ടാന് കയറിയ മൂന്ന് ആരാധകര്ക്ക് ഷോക്കേറ്റ് ദാരുണാന്ത്യം. കര്ണാടകയിലെ ഗദഗ് ജില്ലയിലെ സുരനാഗി ഗ്രാമത്തിലാണ് സംഭവം. യാഷിന്റെ 38-ാം ജന്മദിനമാണിന്ന്. ഇതിന്റെ ആഘോഷത്തിനായി ബാനറുകള് സ്ഥാപിക്കുന്നതിനിടെയാണ് ദുരന്തം സംഭവിച്ചത്.
ഞായറാഴ്ച രാത്രി വൈകിയാണ് സംഭവം. രണ്ടുപേര് പരിക്കേറ്റ് ലക്ഷ്മേശ്വര് താലൂക്ക് ആശുപത്രിയില് ചികിത്സയിലാണ്. ഹനുമന്ത് ഹരിജന് (21), മുരളി നടുവിനാമണി (20), നവീന് (19) എന്നിവരാണ് മരിച്ചത്. ചരടില് കെട്ടിയ ബാനര് ഹൈ-ടെന്ഷന് വയര് പോകുന്നത് ശ്രദ്ധിക്കാതെ മുകളിലേക്ക് ഉയര്ത്തുകയായിരുന്നു.
ബാനര് വൈദ്യുത കമ്പിയില് സ്പര്ശിച്ചതോടെ മൂന്ന് ആരാധകര്ക്ക് വൈദ്യുതാഘാതമേറ്റു. ഇവരെ രക്ഷിക്കാന് ശ്രമിച്ച മറ്റ് രണ്ട് പേര്ക്കും പരിക്കേല്ക്കുകയായിരുന്നു. അഞ്ചുപേരെയും ആശുപത്രിയിലേക്ക് എത്തിച്ചെങ്കിലും മൂന്നുപേരുടെ ജീവന് രക്ഷിക്കാന് സാധിച്ചില്ല.
താന് ഈ ജന്മദിനം ആഘോഷിക്കുന്നില്ലെന്ന് യാഷ് അറിയിച്ചിട്ടുണ്ട്. ആരാധകരെ കാണാനും യാഷ് എത്തില്ല. അതേസമയം, ‘ടോക്സിക്’ ആണ് യാഷിന്റെതായി ഒരുങ്ങുന്നത്. ഗീതു മോഹന്ദാസ് സംവിധാനം ചെയ്യുന്ന ചിത്രം 2025 ഏപ്രിലില് ആണ് റിലീസ് ചെയ്യുന്നത്.