എംടി വാസുദേവന്‍ നായരുടെ തിരക്കഥയില്‍ മോഹന്‍ലാലിനെയും മമ്മൂട്ടിയെയും നായകന്‍മാരാക്കി ഒരു സിനിമ ചെയ്യാന്‍ പ്ലാന്‍ ചെയ്തിരുന്നുവെന്ന് സംവിധായകന്‍ സിബി മലയില്‍. ഒരിക്കല്‍ ക്ലബ്ബ് എഫ്എമ്മിന് നല്‍കിയ അഭിമുഖത്തിലാണ് സംവിധായകന്‍ നടക്കാതെ പോയ സിനിമയെ കുറിച്ച് പറഞ്ഞത്. ഈ വാക്കുകളാണ് ഇപ്പോഴും ശ്രദ്ധ നേടുന്നത്.
എംടി സാറുമായി എനിക്ക് ഒരു സിനിമ ചെയ്യാന്‍ പറ്റുമോ എന്നൊന്നും അന്ന് തനിക്ക് അറിയില്ലായിരുന്നു. വിദൂര സ്വപ്‌നത്തിലും അതുണ്ടായിരുന്നില്ല. ഒരിക്കല്‍ സെവന്‍ ആര്‍ട്‌സ് വിജയകുമാറായിരുന്നു എന്നോട് എംടി വാസുദേവന്‍ നായരുടെ തിരക്കഥയില്‍ ഒരു സിനിമ പ്ലാന്‍ ചെയ്താലോ എന്ന് ചോദിക്കുന്നത്.
ഹിസ് ഹൈനസ് അബ്ദുള്ള എന്ന സിനിമയുടെ വിതരണക്കാര്‍ അവരായിരുന്നതിന്റെ പരിചയമുണ്ടായിരുന്നു. എനിക്ക് അത്ഭുതമായിരുന്നു. അദ്ദേഹത്തെ സമീപിക്കാന്‍ എനിക്ക് കഴിയുമായിരുന്നില്ല. വിജയകുമാര്‍ എംടിയോട് ഒരു തിരക്കഥ ചോദിക്കാമെന്ന് വ്യക്തമാക്കി.
ജൂലിയര്‍ സീസര്‍ ചെയ്യാം എന്ന് എംടി പറയുകയും ചെയ്തു. മമ്മൂട്ടിയെയും മോഹന്‍ലാലിനെയും വെച്ച് ഒരു സിനിമ ചെയ്യാം എന്നായിരുന്നു ആലോചന. അത് എന്റെ കയ്യില്‍ ഒതുങ്ങുന്ന സിനിമ ആണെന്ന് തോന്നിയിരുന്നില്ല. എന്നാലും എംടിയും വിജയകുമാറും ഒന്നിച്ചുള്ളതിനാല്‍ സിനിമയുമായി കുറച്ചു മുന്നോട്ടുപോയി.
ലൊക്കേഷന്‍ ഒക്കെ കാണാന്‍ പോയി. മൈസൂര്‍ കൊട്ടാരമൊക്കെ ഞങ്ങള്‍ സന്ദര്‍ശിച്ചു. കാസ്റ്റിംഗ് ആയപ്പോള്‍ വലിയ ബജറ്റ് സിനിമയായി. മലയാളത്തില്‍ അന്ന് അത്ര ബജറ്റുള്ള സിനിമ എടുക്കാന്‍ പറ്റില്ലായിരുന്നു. മാര്‍ക്കറ്റ് ഉണ്ടായിരുന്നില്ല. അങ്ങനെ അത് വേണ്ടെന്നു വച്ചു എന്നാണ് സിബി മലയില്‍ പറയുന്നത്. അതേസമയം, പിന്നീടാണ് എംടിക്കൊപ്പം സിബി മലയില്‍ സദയം ചെയ്തത്.