തിരുവനന്തപുരത്തെ ഇളക്കിമറിച്ച് തെന്നിന്ത്യൻ സൂപ്പർ താരം വിജയ്. ‘ദി ഗോട്ട്’ എന്ന സിനിമയുടെ ക്ലൈമാക്സ് ചിത്രീകരണത്തിനായി തിരുവനന്തപുരത്തെത്തിയതായിരുന്നു താരം.
ആയിരക്കണക്കിന് ആരാധകരാണ് വിജയ്യെ കാണാനായി ഗ്രീൻഫീൽഡ് സ്റ്റേഡിയത്തിൽ തടിച്ചുകൂടിയത്. “എന്റെ അനിയത്തിമാർ, അനിയൻമാർ, ചേട്ടന്മാർ, ചേച്ചിമാർ, അമ്മമാർ… എല്ലാ മലയാളികൾക്കും എന്റെ ഹൃദയം നിറഞ്ഞ നന്ദി’ എന്ന് കുറിച്ചാണ് ഇൻസ്റ്റഗ്രാമിൽ വിജയ് വീഡിയോ പങ്കുവെച്ചത്.
“തമിഴ്നാടും കേരളവും എന്റെ രണ്ട് കണ്ണുകൾ പോലെ. ഈ ജന്മം അല്ല, ഇനി എത്ര ജന്മം എടുത്താലും ഞാൻ നിങ്ങളുടെ വിജയ് ആണ് നിങ്ങളുടെ ദളപതിയാണ്. കഴിഞ്ഞ 32 വർഷത്തിനിടെ എന്നെ ഒരു നടനായി മാത്രം കാണാതെ നിങ്ങളുടെ വീട്ടിലെ മകനെ പോലെ എന്നെ കണ്ടു. അതാണ് എന്നെ അത്ഭുതപ്പെടുത്തുന്നത്.” എന്നാണ് ആരാധകരെ അഭിസംബോധന ചെയ്ത് വിജയ് പറഞ്ഞ വാക്കുകൾ. പങ്കുവെച്ച് നിമിഷങ്ങൾക്കകം 12 മില്ല്യൺ ആളുകളാണ് വീഡിയോ കണ്ടിരിക്കുന്നത്.
View this post on Instagram
പ്രശാന്ത്, പ്രഭു ദേവ, സ്നേഹ, ലൈല, ജയറാം, മീനാക്ഷി ചൗധരി, മോഹൻ, അജ്മൽ അമീർ, യോഗി ബാബു, വിടിവ ഗണേഷ്, തുടങ്ങി വൻതാരനിരയാണ് ചിത്രത്തിൽ അണിനിരക്കുന്നത്. എ. ജി. എസ് എന്റർടൈൻമെന്റാണ് ചിത്രം നിർമ്മിക്കുന്നത്. ലിയോക്ക് ശേഷം എത്തുന്ന വിജയ് ചിത്രമെന്ന പ്രത്യേകതയും ഗോട്ടിനുണ്ട്.
യുവൻ ശങ്കർ രാജയാണ് ചിത്രത്തിന് സംഗീതമൊരുക്കുന്നത്. സയൻസ് ഫിക്ഷൻ ഴോണറിലുള്ള ചിത്രത്തിന് വേണ്ടി വിര്ച്വൽ പ്രൊഡക്ഷന്റെ ഭാഗയമായുള്ള സെറ്റ് വർക്കുകളുടെ ചിത്രങ്ങള് വെങ്കട് പ്രഭു പങ്കുവെച്ചതും ഇതിനുവേണ്ടി വിജയ്യും സംവിധായകനും അമേരിക്ക സന്ദർശിച്ചതും വാർത്തകളിലിടം നേടിയിരുന്നു.