തമിഴ്നാടിനെ ദുരിതത്തിലാക്കിയ പ്രളയം ജനജീവിതത്തെ സാരമായി തന്നെ ബാധിച്ചിട്ടുണ്ട്. ദുരിതാശ്വാസ പ്രവര്ത്തനങ്ങളില് സജീവമായി ഇടപെടണമെന്ന് തന്റെ ആരാധകരോട് അഭ്യര്ത്ഥിച്ചിരിക്കുകയാണ് നടന് വിജയ് ഇപ്പോള്. തന്റെ എക്സ് അക്കൗണ്ടിലൂടെയാണ് വിജയ് ആരാധക സംഘടനകളോട് ദുരിതാശ്വാസ പ്രവര്ത്തനങ്ങള്ക്ക് ഇറങ്ങിയത്.
”ചെന്നൈയിലും പ്രാന്തപ്രദേശങ്ങളിലും മിഷോങ് ചുഴലിക്കാറ്റിനെ തുടര്ന്നുണ്ടായ കനത്ത മഴയില് കുട്ടികളും സ്ത്രീകളും പ്രായമായവരും ഉള്പ്പെടെയുള്ള പൊതുജനങ്ങള് ഏറെ ബുദ്ധിമുട്ടുകയാണ്. വെള്ളവും ഭക്ഷണവുമില്ലാതെയും മതിയായ അടിസ്ഥാന സൗകര്യങ്ങളില്ലാതെയും ആയിരക്കണക്കിന് ആളുകള് ദുരിതമനുഭവിക്കുന്നതായി റിപ്പോര്ട്ടുകളുണ്ട്.”
”വെള്ളപ്പൊക്കത്തില് നിന്ന് കരകയറാന് സഹായിക്കണമെന്ന് സോഷ്യല് മീഡിയയിലൂടെയും നിരവധിപേര് അഭ്യര്ത്ഥിക്കുന്നു. ഈ വേളയില്, ദുരിതബാധിത പ്രദേശങ്ങളിലെ ജനങ്ങളെ സഹായിക്കുന്നതിനായി സര്ക്കാര് നടത്തുന്ന രക്ഷാപ്രവര്ത്തനത്തില് സന്നദ്ധപ്രവര്ത്തകരായി ഇറങ്ങണമെന്ന് എല്ലാ വിജയ് മക്കള് ഇയക്കം ഭാരവാഹികളോടും വിനീതമായി അഭ്യര്ത്ഥിക്കുന്നു” എന്നാണ് വിജയ്യുടെ വാക്കുകള്.
അതേസമയം വെള്ളക്കെട്ടും അവശ്യസാധനങ്ങളുടെ ദൗര്ലഭ്യവും തുടരുന്നതിനിടെ ചെന്നൈ നഗരവാസികള് പ്രളയദുരിതം മറികടന്ന് സാധാരണ ജീവിതത്തിലേക്ക് മടങ്ങിത്തുടങ്ങി. നഗരത്തിലെ 60 ശതമാനം സ്ഥലത്തും വെള്ളക്കെട്ട് നീങ്ങുകയും വൈദ്യുതി എത്തുകയും ചെയ്തെന്ന് അധികൃതര് പറയുന്നത്.