ഗായിക സുജാതയ്ക്ക് നല്കാനിരുന്ന ദേശീയ അവാര്ഡ് അട്ടിമറിച്ചാണ് ശ്രേയ ഘോഷാലിന് നല്കിയതെന്ന് സംവിധായകന് സിബി മലയില്. ‘പരദേശി’ എന്ന സിനിമയിലെ ‘തട്ടം പിടിച്ചു വലിക്കല്ലേ’ എന്ന ഗാനത്തിന് സുജാതയ്ക്ക് ദേശീയ അവാര്ഡ് നല്കാന് ജൂറി തീരുമാനിച്ചിരുന്നു.
എന്നാല് ബാഹ്യ ഇടപെടലിലൂടെ വിധിനിര്ണയം അട്ടിമറിച്ചു എന്നാണ് സംവിധായകന് വെളിപ്പെടുത്തിയിരിക്കുന്നത്. സംവിധായകന് പി.ടി കുഞ്ഞുമുഹമ്മദിന്റെ സംഭാവനകള് മുന്നിര്ത്തി സുഹൃത്തുകള് സംഘടിപ്പിച്ച ‘പി.ടി കലയും കാലവും’ എന്ന പരിപാടിയില് സംസാരിക്കവെയാണ് സിബി മലയില് ഇക്കാര്യം വെളിപ്പെടുത്തിയത്.
”ഛായാഗ്രാഹകന് സണ്ണി ജോസഫും ഞാനുമാണ് ആ ജൂറിയിലുണ്ടായിരുന്ന മലയാളികള്. പരദേശിക്ക് സംവിധായകന്, ചമയം, ഗാനരചന, ഗായിക എന്നിവയ്ക്ക് എന്തായാലും അവാര്ഡ് കിട്ടണമെന്ന് ഞങ്ങള് ആഗ്രഹിക്കുകയും അതിനായി ശക്തമായി വാദിക്കുകയും ചെയ്തു.”
”സുജാതയ്ക്ക് മികച്ച ഗായികയ്ക്കുള്ള അവാര്ഡ് സമിതി തീരുമാനിച്ചു. എന്നാല്, ഉത്തരേന്ത്യക്കാരനായ ഫെസ്റ്റിവല് ഡയറക്ടര് ആര്ക്കാണ് ഗായികയ്ക്കുള്ള അവാര്ഡ് എന്ന് ചോദിച്ചു. സുജാതയ്ക്കെന്ന് അറിഞ്ഞപ്പോള് ‘ജബ് വി മെറ്റി’ലെ ശ്രേയാ ഘോഷാലിന്റെ പാട്ട് കേട്ടിട്ടില്ലേ എന്ന് ചോദിച്ചു.”
”അദ്ദേഹം മുന്കൈയെടുത്ത് വീഡിയോ കാസറ്റ് കൊണ്ടുവന്ന് പ്രദര്ശിപ്പിച്ച് അവാര്ഡ് തിരുത്തിക്കുകയായിരുന്നു. ജൂറിക്ക് രഹസ്യ സ്വഭാവമുണ്ടെങ്കിലും കാലം കുറേയായതു കൊണ്ടാണ് ഇപ്പോള് ഈ വിവരം പുറത്തു പറയുന്നത്” എന്നാണ് സിബി മലയില് പറയുന്നത്.