ഐഡിയ സ്റ്റാർ സിംഗർ എന്ന റിയാലിറ്റി ഷോയിലൂടെ പ്രശസ്തയായ ഗായികയാണ് അഞ്ജു ജോസഫ്. പിന്നീട് അവതാരികയായും മറ്റും താരം ടെലിവിഷൻ ഷോകളിളും അഞ്ജു സജീവമായിരുന്നു.
നേരത്തെ തന്റെ വിവാഹമോചനത്തെ കുറിച്ചും മാനസികാരോഗ്യത്തെ കുറിച്ചും അഞ്ജു ജോസഫ് തുറന്നുപറഞ്ഞിരുന്നു. ഇപ്പോഴിതാ തന്റെ വർക്കൗട്ടിനെ കുറിച്ചും ഫിറ്റ്നസിനെ കുറിച്ചും അഞ്ജു പറഞ്ഞ വാക്കുകളാണ് ചർച്ചയാവുന്നത്. ഒരു പ്രമുഖ ട്രെയിനർ പണം തരാം അവരോടൊപ്പം വർക്കൗട്ട് ചെയ്യാമോയെന്ന് ചോദിച്ച് തനിക്ക് മെസേജ് അയച്ചിരുന്നുവെന്നാണ് അഞ്ജു പറയുന്നത്.
“ഞാൻ വർക്കൗട്ട് ചെയ്യുന്നതിന് പല കാരണങ്ങൾ ഉണ്ട്. ഫിറ്റായിട്ടിരിക്കേണ്ടത് പ്രധാനപ്പെട്ട ഒരു കാരണമാണ്. രണ്ടാമത്തേത് മാനസികാരോഗ്യം മെച്ചപ്പെടുത്താനും കൂടിയാണ്. എനിക്ക് നന്നായി ഉറങ്ങണം. ഞാൻ ഒറ്റയ്ക്ക് ജീവിക്കുന്നയാളാണ്. അപ്പോൾ മുന്നോട്ടുളള കാര്യങ്ങളും നോക്കണം. ഓൾഡ് ഏജ് ഹോമിൽ പോയി ജീവിക്കേണ്ട എന്തെങ്കിലും സാഹചര്യം വന്നാൽ ആരോഗ്യത്തോടെയിരിക്കാനും കൂടിയാണ്.
ഞാനും എന്റെ ട്രെയിനറും തമ്മിൽ വർക്കൗട്ട് ചെയ്യുന്ന വീഡിയോകൾ സോഷ്യൽ മീഡിയയിൽ പോസ്റ്റ് ചെയ്യാറുണ്ട്. അതുകണ്ട് വർക്കൗട്ട് ചെയ്യിപ്പിക്കുന്ന ഒരു ട്രെയിനർ എനിക്ക് മെസേജ് ചെയ്തു. പണം തരാം അവരോടൊപ്പം വർക്കൗട്ട് ചെയ്യാമോയെന്ന് ചോദിച്ചാണ് മെസേജ് ചെയ്തത്. ഞാനത് കണ്ട് അതിശയിച്ചുപോയി.
സമയത്ത് ജീവിക്കണമെന്നാണ് ജീവിതത്തിൽ നിന്ന് പഠിച്ചത്. മുപ്പത് വയസിനുശേഷമാണ് ഞാൻ ജീവിക്കാൻ പഠിച്ചത്. ഒരു വലിയ ട്രോമയുണ്ടായതിനുശേഷമാണ് അത് മനസിലാക്കാൻ സാധിച്ചത്. പക്ഷെ ഇപ്പോഴാണ് ഞാൻ ശരിയായി ജിവിച്ചുതുടങ്ങിയത്. ഓരോ ദിവസവും പ്രശ്നങ്ങൾ ഉണ്ടാകും. അത് അംഗീകരിച്ച് മുന്നോട്ട് പോയാൽ മതി.” എന്നാണ് ഒരു യൂട്യൂബ് ചാനലിന് നൽകിയ അഭിമുഖത്തിൽ അഞ്ജു ജോസഫ് പറഞ്ഞത്.