തെന്നിന്ത്യൻ സിനിമയിലെ സൂപ്പർ താരമായി തിളങ്ങുകയാണ് നടി തൃഷ. 1999ൽ പുറത്തിറങ്ങിയ ജോഡി എന്ന സിനിമയിലൂടെയാണ് തൃഷ തമിഴിൽ നായികയാകുന്നത്. പിന്നീട് ഒരുപിടി നല്ല ചിത്രങ്ങളിലൂടെ തമിഴ് സിനിമയിലെ മുൻനിര നായികയായി മാറി.
രജനികാന്ത്, കമൽഹാസൻ, വിജയ്, അജിത്, സൂര്യ, വിക്രം തുടങ്ങി തമിഴിലെ എല്ലാ മുൻനിര താരങ്ങളോടൊപ്പം നായികയായി അഭിനയിക്കുകയും ചെയ്തു. തൃഷയുടെ സിനിമാ അരങ്ങേറ്റത്തെ കുറിച്ച് സംവിധായകൻ പ്രവീൺ ഗാന്ധി പറഞ്ഞ വാക്കുകളാണ് ഇപ്പോൾ ശ്രദ്ധ നേടുന്നത്.
തൃഷ ആദ്യമായി അഭിനയിച്ച ജോഡി എന്ന ചിത്രത്തിന്റെ സംവിധായകനാണ് പ്രവീൺ ഗാന്ധി. സിമ്രാന് അന്ന് തൃഷയോട് അസൂയ തോന്നിയിരുന്നെന്നാണ് സംവിധായകൻ പറയുന്നത്. തൃഷയോട് മറ്റൊരു കഥാപാത്രം ചെയ്യുന്നോ എന്ന് താൻ ചോദിച്ചിരുന്നുവെന്നും എന്നാൽ തൃഷ സിമ്രാന്റെ സുഹൃത്തിന്റെ വേഷം മതിയെന്ന് പറയുകയായിരുന്നു എന്നും അദ്ദേഹം പറയുന്നു.
‘ജോഡിയിൽ മറ്റൊരു കഥാപാത്രത്തെ അവതരിപ്പിക്കുന്നുണ്ടോ എന്ന് ഞാൻ തൃഷയോട് ചോദിച്ചു. പക്ഷേ അവർക്ക് അത് വേണ്ടായിരുന്നു. സിനിമ എങ്ങനെയായിരിക്കുമെന്ന് അറിയാനും ഷൂട്ടിങ് കാണാനുമാണ് താൻ വന്നതെന്ന് അവർ പറഞ്ഞു. പിന്നീട് എനിക്ക് ഈ വേഷം മതിയെന്ന് പറഞ്ഞ് സിമ്രാന്റെ സുഹൃത്തിന്റെ വേഷം ചെയ്യുകയായിരുന്നു’ പ്രവീൺ പറയുന്നു.
സിമ്രാന്റെ അടുത്തുനിൽക്കുന്ന ഒരു രംഗമാണ് ചിത്രീകരിച്ചത്. സിമ്രാന്റെ അടുത്ത് തൃഷയെ നിർത്തി ഒരു ഫ്രെയിം പ്ലാൻ ചെയ്തു. ഇതിനിടെ സിമ്രാൻ തൃഷയെ ഏകദേശം 20 തവണ നോക്കിയിട്ടുണ്ടാകും. ഇവൾ എന്ത് സുന്ദരിയാണെന്ന അസൂയ സിമ്രാന്റെ കണ്ണുകളിൽ കാണാമായിരുന്നു. ശേഷം ഒരു ടേക്കിൽ ഞങ്ങൾ ആ ഷോട്ട് തീർത്തു’ പ്രവീൺ ഗാന്ധി അഭിമുഖത്തിൽ പറഞ്ഞു.
പൊന്നിയിൻ സെൽവൻ, ലിയോ തുടങ്ങിയ സിനിമകളിലൂടെ ഗംഭീര തിരിച്ചുവരവാണ് തൃഷ നടത്തിയിരിക്കുന്നത്. നിരവധി പുതിയ സിനിമകളാണ് തൃഷയുടേതായി പുറത്തിറങ്ങാൻ ഒരുങ്ങുന്നത്. മോഹൻലാൽ – ജീത്തു ജോസഫ് കൂട്ടുകെട്ടിൽ ഒരുങ്ങുന്ന റാം, ടോവിനോ ചിത്രം ഐഡന്റിറ്റി, അജിത്തിനെ നായകനാക്കി മഗ്ഗിഴ് തിരുമേനി സംവിധാനം ചെയ്യുന്ന വിടമുയർച്ചി എന്നിവയാണ് റിലീസിന് തയ്യാറെടുക്കുന്നത്.