വെറും എട്ട് മിനിറ്റ് മാത്രമുള്ള ശിവ രാജ്കുമാറിന്റെ ‘ജയിലറി’ലെ കാമിയോ റോള് ആരാധകര് ആഘോഷമാക്കിയിരുന്നു. കന്നഡ സൂപ്പര് താരമായ ശിവ രാജ്കുമാറിനെ അധികം അറിയാത്തവര് പോലും ജയിലറിലെ കാമിയോ റോള് ഏറ്റെടുത്തിരുന്നു. കൈയ്യിലൊരു ടിഷ്യു പേപ്പര് മാത്രമെടുത്ത് മാസ് കാണിച്ച ‘നരസിംഹ’ ജയിലറിനെ കുറിച്ച് പറഞ്ഞ വാക്കുകളാണ് ഇപ്പോള് ശ്രദ്ധ നേടുന്നത്.
ജയിലറിലെ കഥാപാത്രം കന്നഡ സിനിമയ്ക്ക് പുറത്ത് തനിക്കുതന്ന പ്രേക്ഷകപ്രീതിയെ കുറിച്ചാണ് ശിവ രാജ്കുമാര് സംസാരിച്ചത്. നരസിംഹ എന്നാണ് പലരും ഇപ്പോള് തന്നെ വിളിക്കുന്നത്. വെറും എട്ട് മിനിറ്റ് മാത്രമുള്ള ഒരു റോള് ആരുടെയെങ്കിലും ജീവിതം ഇതുപോലെ മാറ്റിമറിച്ചിട്ടുണ്ടാവുമോ എന്നറിയില്ല.
എന്നെ സംബന്ധിച്ചിടത്തോളം ഇതൊരു പുതിയ അനുഭവമാണ്. 80 സീനുകള് കൊണ്ട് ഒരു സിനിമയെ ചുമലിലേറ്റുന്ന നായകനടനാണ് ഞാന്. ജയിലറില് ഞാന് വെറും എട്ട് മിനിറ്റുള്ള വേഷമാണ് ചെയ്തത്. ഇപ്പോള് ഇവര് എന്നെ വിക്രമിലെ റോളക്സിനോടാണ് താരതമ്യം ചെയ്യുന്നത്. എന്താണ് സംഭവിക്കുന്നതെന്നറിയില്ല.
അത് പുതിയ അനുഭവമായിരുന്നു. ഞാന് അഭിനയിക്കുകയാണെന്ന് ആളുകള് കരുതിയേക്കാം. പക്ഷേ സത്യം അതല്ല. ജയിലറിലെ കഥാപാത്രത്തിന് കിട്ടിയ സ്വീകാര്യതകണ്ട് എന്റെ ഭാര്യ പോലും ചോദിച്ചു, ഇവിടെ എന്താണ് നടക്കുന്നതെന്ന്.
ചെന്നൈ, ഹൈദരാബാദ്, യു.എസ്, ദുബായ് തുടങ്ങി എവിടെ പോയാലും ജയിലറിന്റെ പേരുപറഞ്ഞാണ് ആളുകള് എന്നെ സമീപിക്കുന്നതെന്ന് പറഞ്ഞാല് നിങ്ങള് വിശ്വസിക്കില്ല. അടുത്തിടെ ഒരു ഹോട്ടലില് പോയപ്പോള് 400ഓളം തമിഴ്നാട്ടുകാര് അവിടെയുണ്ടായിരുന്നു. എല്ലാവരും വന്ന് സെല്ഫിയെടുത്തു എന്നാണ് ഒരു അഭിമുഖത്തില് ശിവ രാജ്കുമാര് പറയുന്നത്.