മോഹന്‍ലാലിന്റെ കാരവാന് ചുറ്റും ഇപ്പോള്‍ ബോളിവുഡ് നിര്‍മ്മാതാക്കളാണെന്ന് നടന്‍ ഷറഫുദ്ദീന്‍. ‘എമ്പുരാന്‍’, ‘തുടരും’ എന്നീ സിനിമകളിലൂടെ മലയാള സിനിമയിലെ ഏറ്റവും ഉയര്‍ന്ന കളക്ഷന്‍ എന്ന നേട്ടം സ്വന്തമാക്കിയിരിക്കുകയാണ് മോഹന്‍ലാല്‍. ആദ്യ 50 കോടി എന്ന റെക്കോര്‍ഡ് മുതല്‍ ഹൈയെസ്റ്റ് ഗ്രോസിങ് ചിത്രം എന്ന റെക്കോര്‍ഡ് വരെ മോഹന്‍ലാലിന്റെ പേരിലാണ്.
ഇതിനിടെയാണ് ഷറഫുദ്ദീന്റെ വാക്കുകള്‍ ശ്രദ്ധ നേടുന്നത്. ”500 കോടി ഗ്രോസ് ആണ് ഈ വര്‍ഷം മലയാളത്തില്‍ നിന്നും ലാലേട്ടന്‍ അടിച്ചെടുത്തത്. അതിനി അടുത്തെന്നും ആരും മറികടക്കുമെന്ന് തോന്നുന്നില്ല. ലാലേട്ടന്റെ കാരവാനിന്റെ ചുറ്റും ഇപ്പോള്‍ ബോളിവുഡില്‍ നിന്നുള്ള നിര്‍മ്മാതാക്കള്‍ ആണെന്നാണ് അറിഞ്ഞത്” എന്നാണ് ഷറഫുദ്ദീന്‍ പറയുന്നത്.
ഒരു സിനിമയുടെ പ്രമോഷനുമായി ബന്ധപ്പെട്ട അഭിമുഖത്തിലാണ് നടന്റെ വാക്കുകള്‍. അതേസമയം, മാര്‍ച്ച് 27ന് തിയേറ്ററിലെത്തിയ എമ്പുരാന്‍ സമ്മിശ്ര പ്രതികരണങ്ങള്‍ക്കിടയിലും ഗംഭീര കളക്ഷനാണ് നേടിയത്. ഈ ചിത്രം ആഗോളതലത്തില്‍ മലയാളത്തിലെ ടോപ് ഗ്രോസറും ഏറ്റവുമധികം ബിസിനസ് നേടിയ സിനിമയുമായി മാറി.
30 ദിവസം കൊണ്ട് 325 കോടിയാണ് എമ്പുരാന്റെ ആഗോള ബിസിനസ് നേട്ടം. ഏപ്രില്‍ 25ന് തിയേറ്ററിലെത്തിയ തരുണ്‍ മൂര്‍ത്തി ചിത്രം തുടരും മികച്ച പ്രതികരണമാണ് നേടുന്നത്. പ്രേക്ഷകര്‍ ആഗ്രഹിച്ച ആ പഴയ മോഹന്‍ലാലിനെ തിരികെ കൊണ്ടുവന്നുവെന്ന അഭിപ്രായങ്ങളാണ് എത്തുന്നത്. ആഗോള ബോക്‌സ് ഓഫീസില്‍ തുടരും 200 കോടി കടന്നിരിക്കുകയാണ്.
