നടന് ദിലീപ് ശങ്കറിന്റെ അപ്രതീക്ഷിത വിയോഗത്തില് നടുക്കം രേഖപ്പെടുത്തുകയാണ് സഹപ്രവര്ത്തകരും സുഹൃത്തുക്കളും. തന്റെ കുടുംബവുമായി ഏറെ അടുപ്പം കാത്തുസൂക്ഷിച്ച ആളാണ് ദിലീപെന്നും ഇതു വിശ്വസിക്കാന് പറ്റാത്ത വിയോഗമായിപ്പോയെന്നും നടന് ഷാജു ശ്രീധര് സോഷ്യല് മീഡിയയില് കുറിച്ചു. ഡിസംബര് 26ന് തന്നെ ഫോണില് വിളിച്ചിരുന്നതായും ഷാജു പങ്കുവച്ച കുറിപ്പില് പറയുന്നത്.
”ഓരോ തവണയും കുടുംബത്തോടൊപ്പം ഒരു യാത്രപോകാം എന്നു പറഞ്ഞ് നീ വിളിക്കുകയും നമ്മള് ഒരുമിച്ച് ഒരുപാട് യാത്രകളും ചെയ്തിട്ടുണ്ട്. ഡിസംബര് 26ന് നിന്റെ കോള് വന്നപ്പോള് ഞാന് അറിഞ്ഞില്ല കൂട്ടുകാരാ ഒരിക്കലും തിരിച്ചു വരാത്ത ഒരു യാത്രയ്ക്കാണ് നീ പോകുന്നത് എന്ന്… വിശ്വസിക്കാന് പറ്റാത്ത വിയോഗം. പ്രിയ കൂട്ടുകാരന് പ്രണാമം” എന്നാണ് ഷാജു ശ്രീധറിന്റെ വാക്കുകള്.
അതേസമയം, ഞായറാഴ്ച ഉച്ചയോടെയാണ് തിരുവനന്തപുരത്തെ സ്വകാര്യ ഹോട്ടലിലാണ് ദിലീപ് ശങ്കറിനെ മരിച്ച നിലയില് കണ്ടെത്തിയത്. മുറിയില് നിന്ന് ദുര്ഗന്ധം വരുന്നതു കണ്ട് സംശയം തോന്നിയതോടെ പൊലീസിനെ അറിയിക്കുകയായിരുന്നു. ദിലീപ് ശങ്കറിന്റെ മരണം ആത്മഹത്യയല്ല എന്നാണ് പൊലീസിന്റെ പ്രാഥമിക നിഗമനം.
ദിലീപ് ശങ്കര് മുറിയില് തലയിടിച്ച് വീണെന്നും ഇതുമൂലം ഉണ്ടായ ആന്തരിക രക്തസ്രാവം ആവാം മരണത്തിലേക്ക് നയിച്ചതെന്നുമാണ് പൊലീസ് നിര്ഗമനം. മുറിയില് നിന്ന് മദ്യക്കുപ്പികള് ഉള്പ്പെടെ കണ്ടെത്തി. ആന്തരിക അവയവങ്ങള് ശാസ്ത്രീയ പരിശോധനയ്ക്ക് അയച്ചു. ഹോട്ടല് ജീവനക്കാരുടെ ഉള്പ്പെടെ മൊഴി രേഖപ്പെടുത്തി.
രണ്ടു ദിവസം മുമ്പാണ് ദിലീപ് ശങ്കര് ഹോട്ടലില് മുറിയെടുത്തത്. എന്നാല് മുറി വിട്ട് പുറത്തേക്കൊന്നും പോയിരുന്നില്ല എന്നാണ് വിവരം. ദുര്ഗന്ധം വമിച്ചതോടെ ഹോട്ടല് ജീവനക്കാര് മുറി തുറന്നു നോക്കി. ഇതോടെയാണ് നടനെ മരിച്ച നിലയില് കണ്ടെത്തിയത്. എറണാകുളത്താണ് ദിലീപ് ശങ്കറിന്റെ വീട്.