ഉണ്ണി മുകുന്ദന് പിന്തുണയുമായി സംഗീത സംവിധായകന് ഷാന് റഹ്മാന്. സിനിമയ്ക്കായി പാട്ടുകള് കൈമാറുന്നതിന് മുമ്പ് തന്നെ തനിക്ക് മുഴുവന് തുകയും കിട്ടിയിരുന്നു എന്നാണ് ഷാന് റഹ്മാന് പറയുന്നത്. ഉണ്ണി മുകുന്ദന് തനിക്കും മറ്റ് അണിയറ പ്രവര്ത്തകര്ക്കും പ്രതിഫലം നല്കിയില്ലെന്ന് ആരോപിച്ച് നടന് ബാല രംഗത്തെത്തിയിരുന്നു.
എന്നാല് പ്രതിഫലം നല്കിയതിന്റെ തെളിവുകള് ഉണ്ണി മുകുന്ദന് പങ്കുവച്ചിരുന്നു. കഴിഞ്ഞ ദിവസം നടന്ന പ്രസ് മീറ്റില് ബാലയ്ക്കുള്ള മറുപടിയും താരം നല്കിയിരുന്നു. ഈ വിഷയത്തോട് പ്രതികരിച്ചാണ് ഷാന് റഹ്മാന് ഫെയ്സ്ബുക്കില് കുറിപ്പ് പങ്കുവച്ചിരിക്കുന്നത്.
ഷാന് റഹ്മാന്റെ കുറിപ്പ്:
ഷെഫീക്കിന്റെ സന്തോഷം എന്ന ചിത്രത്തിന് വേണ്ടി പ്രവര്ത്തിച്ചതിന് പ്രതിഫലം ലഭിച്ചോ എന്ന് അന്വേഷിക്കാന് ഏതാനും ഓണ്ലൈന് മാധ്യമങ്ങള് എന്നെ വിളിച്ചിരുന്നു. കൃത്യമായും മുഴുവനായുമുള്ള തുക കിട്ടിയെന്നാണ് അവരോട് പറഞ്ഞത്. പാട്ടുകളെല്ലാം ചെയ്ത് കൈമാറുന്നതിന് മുമ്പ് തന്നെ എനിക്ക് മുഴുവന് പ്രതിഫലവും കിട്ടിയെന്ന് ഉണ്ണി ഉറപ്പ് വരുത്തിയിരുന്നു.
ഉണ്ണി എന്റെ ഒരു പ്രിയ സുഹൃത്താണ്. പക്ഷേ എനിക്ക് പ്രതിഫലം നല്കുമ്പോള് അവന് വളരെ പ്രൊഫഷണലായിരുന്നു. പാട്ടുണ്ടാക്കുന്ന സെഷനുകളിലെല്ലാം തന്നെ രസകരമായിരുന്നു. അനൂപ്, വിപിന്, വിനോദേട്ടന് തുടങ്ങി എല്ലാവരും തികഞ്ഞ പ്രൊഫഷണലുകള്. എനിക്കൊരു ബുദ്ധിമുട്ടും തോന്നിയില്ല. ഇവിടെ ഞാന് എന്റെ കാര്യം നോക്കിയിരിക്കുന്നു. അതാണ് എന്റെ സന്തോഷം.