തന്റെ കാര് അപകടത്തില് പെട്ടതിനെ കുറിച്ച് സംസാരിച്ച് സിനിമാ-സീരിയല് താരം ശരത് ദാസ് കഴിഞ്ഞ ദിവസം രംഗത്തെത്തിയിരുന്നു. ഒരു ബസ് തന്റെ കാറില് വന്നിടിച്ചതിനെ കുറിച്ചാണ് ശരത് ഫെയ്സ്ബുക്കില് പങ്കുവച്ച വീഡിയോയില് പറഞ്ഞത്.
എന്നാല് അത് ആറ് മാസം മുമ്പാണ്ടായ സംഭവമാണെന്ന് വ്യക്തമാക്കിയിരിക്കുകയാണ് താരം ഇപ്പോള്. വലത് ഭാഗത്ത് സ്ഥലമുണ്ടായിട്ടും ബസ് കാറില് വന്ന് ഇടിക്കുകയായിരുന്നു എന്നാണ് ശരത് പറഞ്ഞത്. അപകടത്തിന്റെ ദൃശ്യങ്ങളും താരം പങ്കുവച്ചിരുന്നു. വീഡിയോയില് ശരത്തിന്റെ ഭാര്യ നിലവിളിക്കുന്നതും കേള്ക്കാം.
ഈ വീഡിയോ പുറത്തെത്തിയതോടെ വാര്ത്തകള് ആവുകയും ചെയ്തിരുന്നു. വാര്ത്തകള് കണ്ട് തന്നെ വിളിച്ച് അന്വേഷിച്ചവര്ക്കുള്ള മറുപടിയുമായാണ് താരം ഇപ്പോള് രംഗത്തെത്തിയിരിക്കുന്നത്. അന്വേഷിച്ചവര്ക്കെല്ലാം നന്ദി പറഞ്ഞു കൊണ്ടാണ് ശരത്തിന്റെ ഫെയ്സ്ബുക്ക് പോസ്റ്റ്.
ശരത്തിന്റെ കുറിപ്പ്:
എല്ലാവര്ക്കും നമസ്കാരം. കഴിഞ്ഞ വീഡിയോയില്, ഞങ്ങള്ക്കുണ്ടായ ഈ അപകടം നടന്ന് കഴിഞ്ഞിട്ട് ആറു മാസങ്ങളായി. ആ വീഡിയോ ഞാന് ഇപ്പൊ ഷെയര് ചെയ്തു എന്നേയുള്ളൂ. ഓണ്ലൈന് പത്രങ്ങളില് വാര്ത്ത കണ്ട് പേടിക്കേണ്ടതായി ഒന്നുമില്ല.
വീഡിയോയില് പറയുന്ന പോലെ, ഈശ്വര സഹായം കൊണ്ട്, ആര്ക്കും പരിക്കുകള് ഒന്നും സംഭവിച്ചില്ല. നേരിട്ടും അല്ലാതെയും വിവരങ്ങള് അന്വേഷിച്ച എല്ലാ ബന്ധുക്കള്ക്കും സുഹൃത്തുക്കള്ക്കും നന്ദി.