പ്രമുഖ നടന് വലിയ തെറ്റിലേക്ക് തിരികൊളുത്തി എന്ന ലിസ്റ്റിന് സ്റ്റീഫന്റെ വാക്കുകള് കൂടുതല് വിവാദത്തിലേക്ക്. ലിസ്റ്റിനെ പ്രൊഡ്യൂസേഴ്സ് അസോസിയേഷനില് നിന്നും പുറത്താക്കണമെന്ന് ആവശ്യപ്പെട്ട് രംഗത്തെത്തി നിര്മ്മാതാവും നടിയുമായ സാന്ദ്ര തോമസ്. മലയാള സിനിമയിലെ നടന്മാരെയാകെ സംശയത്തിന്റെ നിഴലില് നിര്ത്തിക്കൊണ്ട് ലിസ്റ്റിന് നടത്തിയ പ്രസ്താവന അനുചിതവും ചട്ടവിരുദ്ധവുമാണെന്ന് സാന്ദ്ര ഫെയ്സ്ബുക്കില് കുറിച്ചു.
സാന്ദ്ര തോമസിന്റെ കുറിപ്പ്:
ഫിലിം പ്രൊഡ്യൂസര്സ് അസോസിയേഷന് ഭാരവാഹിക്കും അസോസിയേഷനില് വിശ്വാസമില്ലാതായോ? സിനിമ സംഘടനകളുടെ ഉദ്ദേശലക്ഷ്യങ്ങളില് പ്രധാനം സിനമക്കകത്തു ഉണ്ടാകുന്ന പ്രശ്നങ്ങളെ രമ്യതയില് പരിഹരിക്കുക എന്നുള്ളതാണ്. എന്നാല് ഇന്നലെ ഒരു പൊതുവേദിയില് വെച്ച് പ്രൊഡ്യൂസഴ്സ് അസോസിയേഷന് ഭാരവാഹികൂടിയായ ശ്രീ ലിസ്റ്റിന് സ്റ്റീഫന് പരസ്യമായി മലയാള സിനിമയിലെ നടന്മാരെയാകെ സംശയത്തിന്റെ നിഴലില് നിര്ത്തിക്കൊണ്ട് നടത്തിയ പ്രസ്താവന അനുചിതവും സംഘടനാചട്ടങ്ങള്ക്ക് വിരുദ്ധവുമാണ്.
മലയാളസിനിമക്ക് ദോഷം ചെയ്യുന്ന ഇത്തരം പ്രസ്താവനകള് നടത്തുന്ന ശ്രീ ലിസ്റ്റിന് സ്റ്റീഫനെ അടിയന്തിരമായി പ്രൊഡ്യൂസഴ്സ് അസോസിയേഷന്റെ ഭാരവാഹിത്തത്തില് നിന്ന് മാത്രമല്ല പ്രാഥമിക അംഗത്വത്തില് നിന്നും പുറത്താക്കണം. എനിക്കുണ്ടായ വ്യക്തിപരമായ വിഷയത്തില് രാജ്യത്തു നിലനില്ക്കുന്ന നിയമങ്ങള്ക്ക് വിധേയമായി ഞാന് മുന്നോട്ട് പോയപ്പോള് എന്നെ സസ്പെന്ഡ് ചെയ്യാന് കാണിച്ച (കോടതിയില് നിലനിന്നില്ല എങ്കില്പ്പോലും) പ്രൊഡ്യൂസഴ്സ് അസോസിയേഷന് നേതൃത്വം ശ്രീ ലിസ്റ്റിന് സ്റ്റീഫനെ പുറത്താക്കാനുള്ള ആര്ജ്ജവം കാണിക്കണം. കൂടാതെ ഉന്നതബോഡി എന്ന നിലയില് കേരളാ ഫിലിം ചേംബര് സ്വമേധയാ ഈ വിഷയത്തില് ഇടപെട്ട് ഉചിതമായ നടപടികള് സ്വീകരിക്കണമെന്ന് ഞാന് അഭ്യര്ത്ഥിക്കുന്നു.
അതേസമയം, ലിസ്റ്റിന് സ്റ്റീഫന് പറഞ്ഞ ‘പ്രമുഖ നടന്’ നിവിന് പോളി ആണെന്നുള്ള റിപ്പോര്ട്ടുകളാണ് ഇപ്പോള് പ്രചരിച്ചു കൊണ്ടിരിക്കുന്നത്. നിവിനെ നായകനാക്കി ലിസ്റ്റിന് നിര്മ്മിക്കുന്ന ‘ബേബി ഗേള്’ സിനിമയുടെ ഫൈറ്റ് മാസ്റ്ററില് നിന്നും കഞ്ചാവ് പിടികൂടിയിരുന്നു. ഇതോടെ സെറ്റില് സഹകരിക്കാന് തയാറാകാതെ നിവിന് പോളി ഇറങ്ങി പോവുകയായിരുന്നു എന്നാണ് റിപ്പോര്ട്ടുകള്.