നടന്‍ ഹക്കീം ഷാജഹാന്റെയും നടി സന അല്‍ത്താഫിന്റെയും വിവാഹവാര്‍ത്തകള്‍ സോഷ്യല്‍ മീഡിയയില്‍ നിറഞ്ഞു നിന്നിരുന്നു. ആഘോഷങ്ങളൊന്നും ഇല്ലാതെ രജിസ്റ്റര്‍ ചെയ്തു കൊണ്ടായിരുന്നു ഇരുവരുടെയും വിവാഹം. സിനിമയില്‍ അഭിനയിക്കുന്നതിനോട് താല്‍പര്യമില്ല എന്ന് തുറന്നു പറഞ്ഞിരിക്കുകയാണ് സന ഇപ്പോള്‍.
വനിത മാഗസിന് നല്‍കിയ അഭിമുഖത്തിലാണ് സന സംസാരിച്ചത്. സിനിമ കരിയറാക്കണമെന്നോ മരിക്കും വരെ ചെയ്യണമെന്നോ തോന്നിയിട്ടില്ല. ഒടിയന് ശേഷം സിനിമയില്‍ അഭിനയിച്ചിട്ടില്ല എന്നാണ് സന പറയുന്നത്. എന്നാല്‍ നല്ല കഥാപാത്രം ലഭിക്കുകയാണെങ്കില്‍ സിനിമയിലേക്ക് മടങ്ങി വരും എന്നും സന വ്യക്തമാക്കി.
”സ്‌കൂള്‍ പഠന കാലത്താണ് നായികയാകുന്നത്. മലയാളത്തിലും തമിഴിലും സിനിമകള്‍ ആയതോടെ പഠനം പാളം തെറ്റുമെന്ന് തോന്നി. ഒപ്പം സിനിമയോടുള്ള താല്‍പര്യവും കുറഞ്ഞു. സിനിമ കരിയറാക്കണമെന്നോ മരിക്കും വരെ ചെയ്യേണ്ട ജോലി ആണെന്നോ തോന്നിയിട്ടില്ല. അഭിനയം അല്ല പാഷന്‍ എന്നും മനസിലായി ഒടിയന് ശേഷം സിനിമയില്‍ അഭിനയിച്ചിട്ടില്ല.”
”സിനിമയിലേക്ക് മടക്കമില്ല എന്നതിന് അര്‍ഥമില്ല. അത്ര ഗംഭീരമായ കഥാപാത്രം വന്നാല്‍ അപ്പോള്‍ ആലോചിക്കാം. സിനിമ വിട്ടതോടെ പഠനത്തില്‍ കൂടുതല്‍ സജീവമായി. എസിസി റാങ്കോടെ പാസ് ആയി. ജോലി കിട്ടിയതോടെ പിന്നെ അതായി ലോകം. അതിനിടെ ചില പരസ്യ ചിത്രങ്ങളില്‍ അഭിനയിച്ചു.”
”ഞാന്‍ തന്നെ നിര്‍മിച്ച ഒരു മ്യൂസിക് വീഡിയോയിലും വേഷമിട്ടു” എന്നാണ് സന അല്‍ത്താഫ് പറയുന്നത്. ‘വിക്രമാദിത്യന്‍’ എന്ന ചിത്രത്തിലൂടെയാണ് സന അഭിനയരംഗത്ത് എത്തുന്നത്. മറിയം മുക്ക്, റാണി പദ്മിനി, ബഷീറിന്റെ പ്രേമലേഖനം എന്നിവയാണ് സനയുടെ മലയാള സിനിമകള്‍. ചെന്നൈ 600028 ll: സെക്കന്‍ഡ് ഇന്നിങ്‌സ്, ആര്‍കെ നഗര്‍, പഞ്ചാരാക്ഷരം എന്നിവയാണ് സനയുടെ തമിഴ് ചിത്രങ്ങള്‍.