നോട്ട് ബുക്ക്, ചോക്ലേറ്റ് തുടങ്ങിയ ചിത്രങ്ങളിലൂടെ പ്രേക്ഷകര്ക്ക് പ്രിയങ്കരിയായി മാറിയ നടിയാണ് റോമ. എന്നാല് കുറച്ചു കാലമായി റോമ അഭിനയജീവിതത്തില് നിന്നും വിട്ടു നില്ക്കുകയായിരുന്നു. 2017-ല് റിലീസ് ചെയ്ത സത്യയിലാണ് നടി അവസാനം പ്രത്യക്ഷപ്പെട്ടത്. സിനിമയില് സജീവമല്ലാതിരുന്ന താരത്തിന് സോഷ്യല് മീഡിയയില് അക്കൗണ്ടുകളും ഉണ്ടായിരുന്നില്ല. എന്നാല് വ്യാജ അക്കൗണ്ടുകള്ക്ക് കുറവുമില്ലായിരുന്നു. ഇപ്പോഴിതാ വെള്ളേപ്പം എന്ന ചിത്രത്തിലൂടെ തിരിച്ചുവരവിന് ഒരുങ്ങുമ്പോള് ഇന്സ്റ്റഗ്രാമില് ആക്കൗണ്ട് തുറന്നിരിക്കുകയാണ് റിമ.
“ഞാന് എവിടെ പോകുന്നു, എന്ത് ചെയ്യുന്നു എന്നതെല്ലാം എന്റെ സ്വകാര്യങ്ങളാണ്. അത് ലോകത്തെ കാണിക്കാന് ഇഷ്ടമില്ല. മുമ്പ് ഫെയ്സ്ബുക്കിലുണ്ടായിരുന്നു. എന്നാല് അത്രയ്ക്ക് ഇഷ്ടം തോന്നിയില്ല. അതോടെ അത് ഉപേക്ഷിച്ചു. പക്ഷേ, ഇപ്പോഴും എന്റെ പേരില് വ്യാജ അക്കൗണ്ടുകളുണ്ട്. ഇന്സ്റ്റഗ്രാമില് കാണാറുണ്ടെന്ന് ഷൂട്ടിംഗിനിടയില് ആരോ പറഞ്ഞപ്പോള് വെറുതേ ചെക്ക് ചെയ്തു. അതോടെ ഒരുപാട് വ്യാജ അക്കൗണ്ടുകളുണ്ടെന്ന് മനസിലായി. അതിനാല് ഈയിടെ ഇന്സ്റ്റഗ്രാമില് പുതിയൊരു അക്കൗണ്ട് തുടങ്ങി. നൂറിന്, അക്ഷയ് എന്നിവരൊക്കെ സജീവമാകണമെന്ന് പറഞ്ഞപ്പോഴാണ് ഇന്സ്റ്റഗ്രാമില് പുതിയൊരു അക്കൗണ്ട് തുടങ്ങാമെന്ന തീരുമാനം എടുത്ത്.” ഒരു അഭിമുഖത്തില് റോമ പറഞ്ഞു.
പതിനെട്ടാം പടിയിലൂടെ ശ്രദ്ധേയനായ അക്ഷയ് രാധാകൃഷ്ണന് നായകനായി എത്തുന്ന വെള്ളേപ്പത്തിന്റെ ചിത്രീകരണം ഡിസംബറില് ആരംഭിച്ചിരുന്നു. ചിത്രം തൃശൂരിലെ വെള്ളേപ്പങ്ങാടിയുടെ പശ്ചാത്തലത്തിലാണ് കഥ പറയുന്നത്. ഒരു അഡാര് ലൗവിലൂടെ ശ്രദ്ധേയയായ നൂറിന് ഷെരീഫാണ് നായിക. ഷൈന് ടോം ചാക്കോയും ശ്രീജിത് രവിയും പതിനെട്ടാം പടി, ജൂണ് എന്നീ ചിത്രങ്ങളിലൂടെ ശ്രദ്ധേയനായ ഫഹീം, തണ്ണീര്മത്തന് ദിനങ്ങളിലൂടെ പ്രേക്ഷകശ്രദ്ധ നേടിയ വൈശാഖും ചിത്രത്തില് മറ്റ് പ്രധാന കഥാപാത്രങ്ങളെ അവതരിപ്പിക്കുന്നു.