അന്തരിച്ച നടി കെപിഎസി ലളിതയുടെ ഓര്മകള് പങ്കുവച്ച് തിരക്കഥാകൃത്തും സംവിധായകനുമായ രഞ്ജിത് ശങ്കര്. ‘സു സു സുധി വാത്മീക’ത്തിന്റെ ഷൂട്ടിനിടയില് സംഭവിച്ച ഹൃദയസ്പര്ശിയായ സംഭവം ഓര്ത്തെടുത്താണ് അദ്ദേഹം കെപിഎസി ലളിതയെ അനുസ്മരിച്ചത്.
രഞ്ജിത് ശങ്കറിന്റെ വാക്കുകള്: ‘സു സു സുധി വാത്മീക’ത്തില് സുധിയുടെ കല്യാണ നിശ്ചയം ഷൂട്ട് ചെയ്തത് ലളിത ചേച്ചിയുടെ കാര്മികത്വത്തിലാണ്. ആ സീനില് സുധി ഏതു വിരലിലാണു മോതിരം ഇടേണ്ടത് എന്ന് സംശയം ചോദിക്കുന്നതും അമ്മ അത് പറഞ്ഞു കൊടുക്കുന്നതും സ്വന്തം മകന്റെ നിശ്ചയ സമയത്ത് നടന്നത് ചേച്ചി പറഞ്ഞു എഴുതിയതാണ്.
അന്ന് ഗുരുതരമായ ഒരപകടം പറ്റി സിദ്ധു ഐസിയുവില് ആണ്. ആ സിനിമ പൂര്ത്തിയാക്കാന് ആശുപത്രിയില് നിന്നാണ് ചേച്ചി വന്നത്. മറ്റേത് സിനിമ ആണെങ്കിലും ചേച്ചി അത് തന്നെ ചെയ്യുമായിരുന്നു.കാരണം ചേച്ചിക്ക് അഭിനയം ജീവനും ജീവിതമായിരുന്നു. ഇനി നമുക്ക് അങ്ങനെ ഒരു നടിയില്ല. പ്രണാമം