പ്രേക്ഷകരെ ഞെട്ടിച്ച ‘ഭ്രമയുഗ’ത്തിന് ശേഷം മമ്മൂട്ടി-രാഹുല്‍ സദാശിവന്‍ കോമ്പോ വീണ്ടും എത്തുന്നു. സിനിമ തിയേറ്ററില്‍ മികച്ച വിജയം സ്വന്തമാക്കി ഒ.ടി.ടിയില്‍ സ്ട്രീമിംഗ് നടക്കുന്നതിനിടെയാണ്, ഇനിയും മമ്മൂട്ടിക്കൊപ്പം സിനിമ ചെയ്യുമെന്ന്‌സംവിധായകന്‍ രാഹുല്‍ സദാശിവന്‍ വ്യക്തമാക്കിയിരിക്കുന്നത്.
മമ്മൂട്ടിയ്ക്ക് ഒപ്പം ഒരു സിനിമ ഉണ്ടാകുമോ എന്ന അവതാരകന്റെ ചോദ്യത്തിനായിരുന്നു രാഹുലിന്റെ മറുപടി, ”ഉറപ്പായും ഉണ്ടാകും. ഒരു സിനിമ കൂടി മമ്മൂക്കയ്ക്ക് ഒപ്പം ചെയ്യണം. അത് എങ്ങനെയാണ് എപ്പോഴാണ് എന്നൊന്നും തീരുമാനിച്ചിട്ടില്ല” എന്നാണ് ഒരു യൂട്യൂബ് ചാനലിന് നല്‍കിയ അഭിമുഖത്തില്‍ രാഹുല്‍ പറഞ്ഞിരിക്കുന്നത്.
ഭ്രമയുഗത്തിന്റെ സീക്വലിനോ, പ്രീക്വലിനോ സാധ്യതയുണ്ട് എന്നും എന്നാല്‍ അതിനെ കുറിച്ച് നിലവില്‍ ആലോചിക്കുന്നില്ലെന്നും രാഹുല്‍ വ്യക്തമാക്കി. ഹിറ്റ് ചിത്രം ‘ഭൂതകാല’ത്തിന് ശേഷം രാഹുല്‍ സദാശിവന്‍ ഒരുക്കിയ ചിത്രമാണ് ഭ്രമയുഗം. ആഗോളതലത്തില്‍ 60 കോടിയ്ക്ക് മുകളിലാണ് ചിത്രം കളക്ട് ചെയ്തത്.
ബ്ലാക്ക് ആന്‍ഡ് വൈറ്റ് തീമില്‍ രാഹുല്‍ സദാശിവന്‍ ഒരുക്കിയ ചിത്രം ഫെബ്രുവരി 15ന് ആണ് തിയേറ്ററിലെത്തിയത്. മാര്‍ച്ച് 15ന് സോണി ലിവിലാണ് ചിത്രത്തിന്റെ സ്ട്രീമിംഗിന് ആരംഭിച്ചത്. കൊടുമണ്‍ പോറ്റി എന്ന കഥാപാത്രമായി സമാനതകളില്ലാത്ത അഭിനയമാണ് മമ്മൂട്ടി ഭ്രമയുഗത്തില്‍ കാഴ്ചവച്ചത്.
മമ്മൂട്ടിയെ കൂടാതെ, അര്‍ജുന്‍ അശോകന്‍, സിദ്ധാര്‍ത്ഥ് ഭരതന്‍, അമല്‍ഡ ലിസ്, മണികണ്ഠന്‍ ആര്‍ ആചാരി എന്നിവരാണ് ചിത്രത്തിലെ അഭിനേതാക്കള്‍. മമ്മൂട്ടിയ്ക്ക് ഒപ്പം തന്നെ അര്‍ജുന്‍ അശോകന്റെയും സിദ്ധാര്‍ത്ഥ് ഭരതന്റെയും പ്രകടനങ്ങളും മികച്ച നിരൂപക പ്രശംസ നേടിയിരുന്നു.
