അല്ലു അർജുനെ നായകനാക്കി സുകുമാർ സംവിധാനം ചെയ്യുന്ന ‘പുഷ്പ: ദ റൂള്’ റിലീസിനൊരുങ്ങുകയാണ്,. ചിത്രത്തിന്റെ ടീസറിന് ഗംഭീര പ്രതികരണമാണ് ലഭിച്ചുകൊണ്ടിരിക്കുന്നത്. കൈയ്യില് ത്രിശൂലവുമായി ഗുണ്ടകളെ ഇടിച്ചിടുന്ന പുഷ്പയെയാണ് ടീസറില് കാണാൻ കഴിയുന്നത്. 2024 ഓഗസ്റ്റ് 15 നാണ് ചിത്രത്തിന്റെ വേൾഡ് വൈഡ് റിലീസ്.
ഇപ്പോഴിതാ ചിത്രത്തിന്റെ ഓടിടി റൈറ്റ്സ് വമ്പൻ തുകയ്ക്ക് സ്വന്തമാക്കിയിരിക്കുകയാണ് പ്രമുഖ ഒടിടി പ്ലാറ്റ്ഫോമായ നെറ്റ്ഫ്ലിക്സ്. 275 കോടി രൂപയ്ക്കാണ് നെറ്റ്ഫ്ലിക്സ് സ്ട്രീമിംഗ് അവകാശം സ്വന്തമാക്കിയിരിക്കുന്നത്. കൂടാതെ ചിത്രത്തിന്റെ തിയേറ്റർ വിജയം കൂടി കണക്കിലെടുത്ത് ത്തുക ഇനിയും ഉയരാനും സാധ്യതയുണ്ട്. ഒരു ഇന്ത്യൻ ചിത്രത്തിന് ലഭിക്കുന്ന ഏറ്റവും ഉയർന്ന ഒടിടി റൈറ്റ്സ് ആണ് പുഷ്പ 2 സ്വന്തമാക്കിയിരിക്കുന്നത്. 175 കോടി നേടിയ ആർആർആർ ആയിരുന്നു ഇതിന് മുന്നെ റെക്കോർഡ് തുകയ്ക്ക് ഒടിടി റൈറ്റ്സ് സ്വന്തമാക്കിയത്.
നേരത്തെ അനില് തടാനിയുടെ ഉടമസ്ഥതയിലുള്ള എഎ ഫിലിംസ് 200 കോടി മുടക്കിയാണ് ചിത്രത്തിന്റെ ഉത്തരേന്ത്യൻ വിതരണാവകാശം സ്വന്തമാക്കിയത് എന്നതും ശ്രദ്ധേയമായ കാര്യമാണ്.
ഫഹദ് ഫാസിലും ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നുണ്ട്. ഭന്വര് സിംഗ് ഷെഖാവത്ത് എന്ന പൊലീസ് കഥാപാത്രമായാണ് ഫഹദ് ചിത്രത്തില് വേഷമിടുന്നത്. അല്ലു അര്ജുന് മികച്ച നടനുള്ള ദേശീയ പുരസ്കാരം നേടി കൊടുത്ത പുഷ്പരാജ് എന്ന കഥപാത്രത്തിന്റെ രണ്ടാംവരവ് സിനിമാലോകം ഏറെ പ്രതീക്ഷയോടെ കാണുന്നത്.
മൈത്രി മൂവി മേക്കേഴ്സ് നിര്മ്മിക്കുന്ന ചിത്രത്തിന്റെ സംഗീത സംവിധാനം നിര്വഹിക്കുന്നത് ദേവിശ്രീ പ്രസാദാണ്. 2021 ഡിസംബര് 17ന് ആയിരുന്നു പുഷ്പ: ദി റൈസ് എന്ന ആദ്യ ഭാഗം റിലീസ് ചെയ്തത്.