തിയേറ്ററിൽ പരാജയപെട്ടിട്ടും തന്റെ കരിയറിലെ ഏറ്റവും പ്രിയപ്പെട്ട ചിത്രത്തെ കുറിച്ച് സംസാരിക്കുകയാണ് പൃഥ്വിരാജ്. സിനിമ അന്നത്തെ കാലത്തെ പ്രേക്ഷകരുമായി കണക്ട് ആവാത്തതുകൊണ്ടാണ് പരാജയപ്പെട്ടതെന്ന് പൃഥ്വിരാജ് പറയുന്നു.
“ഒരു സിനിമ വർക്ക് ആയില്ലെങ്കിൽ അതിൻ്റെ അർത്ഥം ആ സിനിമ പ്രേക്ഷകരുമായി കണക്ട് ആയില്ല എന്നാണ്. നമ്മൾ സിനിമകൾ ഉണ്ടാക്കേണ്ടത് പ്രേക്ഷകരുമായി കണക്ട് ചെയ്യാൻ വേണ്ടി തന്നെയാണ്
എന്റെ സിനിമാ ജീവിതത്തിൽ ഞാൻ അഭിനയിച്ചതിൽ എനിക്ക് ഏറ്റവും ഇഷ്ടമുള്ള ഒരു സിനിമയുണ്ട് സിറ്റി ഓഫ് ഗോഡ്. അതിൻ്റെ സംവിധായകൻ ലിജോ ജോസ് പെല്ലിശ്ശേരിയാണ്. എനിക്ക് ഒരുപാട് ഇഷ്ടമാണ് ആ സിനിമ. അതിലെ എന്റെ കഥാപാത്രവും എൻ്റെ ഫേവറീറ്റാണ്. ലിജോ ബ്രില്യൻ്റ് ആയി ചെയ്ത സിനിമയാണത്. പക്ഷെ അത് തിയേറ്ററുകളിൽ വർക്കായില്ല
അതൊരു നല്ല സിനിമയായിരുന്നു എന്ന് എനിക്ക് പറയാൻ കഴിയും. അതൊരു മികച്ച ചിത്രമാണ്. പക്ഷെ അത് തിയേറ്ററിൽ വർക്ക് ആയില്ല, അതുകൊണ്ട് തന്നെ ആ സമയത്ത് പ്രേക്ഷകരുമായി ആ ചിത്രം കണക്ട് ആയില്ല.” ഗലാട്ട പ്ലസിന് നൽകിയ അഭിമുഖത്തിലാണ് പൃഥ്വിരാജ് ‘സിറ്റി ഓഫ് ഗോഡ്’ എന്ന ചിത്രത്തെ കുറിച്ച് സംസാരിച്ചത്.
ലിജോ ജോസ് പെല്ലിശ്ശേരി സംവിധാനം ചെയ്ത് 2011-ൽ പുറത്തിറങ്ങിയ ചിത്രമാണ് ‘സിറ്റി ഓഫ് ഗോഡ്’. പൃഥ്വിരാജ്, ഇന്ദ്രജിത്ത്, പാർവ്വതി തിരുവോത്ത്, റീമ കല്ലിങ്ങൽ എന്നിവർ പ്രധാന വേഷത്തിലെത്തിയ ചിത്രം റിലീസിന് ശേഷം നിരവധി നിരൂപക പ്രശംസകൾ പിടിച്ചുപറ്റിയിരുന്നു.
അതേസമയം പൃഥ്വിരാജ്, പ്രഭാസ് എന്നിവർ പ്രധാന വേഷത്തിലെത്തുന്ന പ്രശാന്ത് നീൽ ചിത്രം ‘സലാർ’ ഇന്ന് റിലീസിനൊരുങ്ങുകയാണ്. വരദരാജ മന്നാർ എന്ന പ്രതിനായക വേഷത്തിലാണ് പൃഥ്വിരാജ് ചിത്രത്തിലെത്തുന്നത്.