ആസിഫ് അലിയും മംമ്ത മോഹന്ദാസും ഒന്നിച്ച് അഭിനയിച്ച ചിത്രമാണ് തുടരുന്നു. ചിത്രത്തില് ആസിഫ് അലിക്ക് വളരെ ചെറിയ സ്ക്രീന് സ്പേസ് മാത്രമേ ഉണ്ടായിരുന്നുള്ളുവെങ്കിലും താരത്തിന്റെ പ്രകടനം ശ്രദ്ധ നേടിയിരുന്നു. സിനിമയില് ആസിഫിന്റെയും മംമ്തയുടെയും മകളായാണ് നടി അനിഖ സുരേന്ദ്രന് വേഷമിട്ടത്.
അന്ന് മകളായ താരത്തെ ഇന്ന് തന്റെ നായിക ആയാണ് പലരും സജസ്റ്റ് ചെയ്യുന്നത് എന്നാണ് ആസിഫ് അലി ഇപ്പോള് തുറന്നു പറഞ്ഞിരിക്കുന്നത്. സിനിമയില് അഭിനയിച്ചതിന് ശേഷമുള്ള അനുഭവമാണ് ആസിഫ് അലി പങ്കുവച്ചിരിക്കുന്നത്.
”ഇപ്പോഴും എന്റെ മോള് ഹയ കഥ തുടരുന്നുവിലെ പാട്ട് കാണുമ്പോള് ചോദിക്കും അത് ആരാണ് എന്റെ മടിയില് ഇരിക്കുന്ന കുട്ടിയെന്ന്. അന്ന് അനിഖയെ മടിയിലിരുത്തി കീ ബോര്ഡ് വായിച്ച് കൊടുക്കുമ്പോള് ഞാന് അവളോട് തമാശയ്ക്ക് പറഞ്ഞിട്ടുണ്ട് നീ ഭാവിയില് എന്റെ ഹീറോയിനായി അഭിനയിക്കുമെന്ന്.”
”അന്ന് അത് തമാശയ്ക്ക് പറഞ്ഞതാണ്. ഇപ്പോള് ഞാന് കഥ കേള്ക്കുമ്പോള് നായികയുടെ കാര്യം പറയുമ്പോള് അനിഖയെ പലരും എനിക്ക് സജസ്റ്റ് ചെയ്യാന് തുടങ്ങി” എന്നാണ് ആസിഫ് അലി പറയുന്നത്. അതേസമയം, ബാലതാരമായി സിനിമയില് എത്തിയ അനിഖ നായികയായി അരങ്ങേറ്റം കുറിക്കുകയാണ്.
‘ഓ മൈ ഡാര്ലിംഗ്’ എന്ന സിനിമയിലൂടെയാണ് അനിഖ മലയാള സിനിമയില് നായികയായി അരങ്ങേറ്റം കുറിക്കാനൊരുങ്ങുന്നത്. ചിത്രത്തിന്റെ ടീസര് എത്തിയപ്പോള് മുതല് ഇന്റിമേറ്റ് സീനുകള് ചര്ച്ചയായിരുന്നു. മെല്വിന് ജി. ബാബു ആണ് ചിത്രത്തില് നായകനായി എത്തുന്നത്.