കൊവിഡ് ബാധിച്ചതിനെ തുടര്ന്ന് നടനും നിര്മ്മാതാവുമായ മണിയന്പിള്ള രാജുവിന് ന്യുമോണിയ വരികയും ശബ്ദം നഷ്ടപ്പെടുകയും ചെയ്തിരുന്നു. ന്യൂമോണിയ ബാധിച്ചതിനെ തുടര്ന്ന് അച്ഛന്റെ നില ഗുരുതരമായിരുന്നു എന്ന് പറഞ്ഞിരിക്കുകയാണ് മണിയന്പിള്ള രാജുവിന്റെ മകന് നിരഞ്ജ്. അന്ന് മമ്മൂട്ടി മാത്രമാണ് വിളിച്ച് അന്വേഷിച്ചിരുന്നതെന്നും നിരഞ്ജ് പറയുന്നുണ്ട്.
അച്ഛന് കോവിഡ് ഒക്കെ ആയി വയ്യാതിരുന്ന സമയത്ത് പല ആള്ക്കാരും ഒരു മെസേജ് പോലും അയച്ചിട്ടില്ല. ന്യുമോണിയ അല്പം കൂടി സീരിയസ് ആയിരുന്നു. ആ സമയത്ത് ഡെയ്ലി തിരക്കിയത് മമ്മൂട്ടി അങ്കിള് മാത്രമാണ്. അതൊരിക്കലും മറക്കാന് ആകാത്ത അനുഭവമാണ് എന്നാണ് നിരഞ്ജ് പറയുന്നത്.
കൂടാതെ മമ്മൂട്ടി അങ്കിള് ഭയങ്കര അപ്ഡേറ്റഡ് ആണെന്നും പലതും അദ്ദേഹത്തില് നിന്നും പഠിക്കാനുണ്ടെന്നും നിരഞ്ജ് ഒരു മാധ്യമത്തിന് നല്കിയ അഭിമുഖത്തില് പറഞ്ഞു. അതേസമയം, കൊച്ചിയില് ഒരു പാട്ടിന്റെ റെക്കോര്ഡിംഗിന് പോയപ്പോഴായിരുന്നു കഴിഞ്ഞ വര്ഷം മണിയന്പിള്ളയ്ക്ക് കോവിഡ് ബാധിച്ചത്.
തലവേദനയും ചുമയും തുടങ്ങിയതോടെ കൊവിഡ് ടെസ്റ്റ് ചെയ്തു. കൊവിഡ് ആണെന്ന് സ്ഥിരീകരിച്ചപ്പോള് ആശുപത്രിയില് പ്രവേശിപ്പിച്ചിരുന്നു. ഇതിനിടെയാണ് താരത്തിന് ന്യുമോണിയ ബാധിച്ചത്. മറ്റൊരു ആശുപത്രിയില് ഐസിയുവിലേക്ക് മാറ്റിയെങ്കിലും താരത്തിന്റെ ശബ്ദം അടക്കം പോയിരുന്നു.